KUCHING: Pengawa ngena uniform sekula ungkup semua nembiak sekula endang nemban sereta patut ditampung rebak baru ba Malaysia.
Presiden Serakup Pengajar Sarawak (STU), Kullin Djayang madah, kebendar pengawa ngena uniform sekula nya ukai siti atur ti meseti dititih tang nya siti pekara ti manah sereta patut dikemerat ba menua kitai.
Iya madah, tebal agi menua maju enda tentu ngemeratka atur nya tang nya enda patut dichunto komuniti kitai.
“Pengawa ngena uniform sekula patut dikemerat rebak baru ba Malaysia ngambi kitai nyadi chunto ngagai menua bukai.
“Pengawa meransang nembiak ngasika atur nya ulih nyadi siti pekara dikena nempa modal mensia menyana dudi hari.
“Kebuah pia laban nya siti chara kitai ngajar sida ngasika atur ngambi lebuh udah besai tuai ila sida deka ngasika atur enggau undang-undang sereta sayauka menua.
“Nya alai, lebuh sida agi biak, tu meh peluang kitai nempa sida ngasika atur sereta enda ngasuh sida kelalu bibas kelimpah mandangka budaya kitai,” ku iya.
Kullin mantaika penemu nya dikena nimbal perambu Opis Menteri Pelajar Malaysia (KPM) ti benung mansik sekali ke deka nerus pengawa nerit atur ngena uniform sekula tauka enda ngagai bala nembiak sekula.
Iya madah, nyangka tebal agi komuniti kitai meda pekara nya nadai tuju tauka konservatif enti dibanding menua maju.
Ku iya, kitai patut ingat, kitai bisi budaya enggau chuan kediri empu lalu kitai meseti beratika pekara nya dulu dikena nempa rebak baru ti ngembuan runding tikas dunya.
“Penanggul gaya hari ti angat enggau gaya kelas ti kurang konduksif enda patut nyadi dalih dikena nendurka atur bekenaka uniform sekula.
“Enti tu nyadi dalih kitai, nama kebuah ari suba kitai enda mantaika isu tu lalu nembiak pen agi ulih belajar baka selama.
“Pia mega, enti ketegal penanggul gaya hari ti angat enggau gaya kelas ti kurang konduksif, perintah patut nyendia fasiliti ti meruan ba semua sekula.
“Nya alai, beguna amat meri agih belanja tambah dikena nyeleti enggau masang airkond ba genap bilik kelas ke pemaik bala nembiak enggau pengajar.
“Lebuh genap bilik kelas dipasang airkond, udah tentu bala nembiak enggau pengajar enda sebana ke diri angat lalu pengawa ngajar enggau belajar (PdP) deka lanchar agi.
“Tu meh maya kitai patut ngalih sereta ngereja pengawa nambahka pemeruan fasiliti sekula enggau bilik kelas,” ku Kullin nyemetak.
Tampung iya, pekara nya ulih dikereja kitai enti semua orang meri kerejasama penuh ngagai pengelantang nembiak enggau bala pengajar.
“Nya alai, atur ngena uniform sekula tu patut ditampung lalu ditendur ungkup bejalaika Subjek Pendidikan Jasmani enggau program kokurikulum aja,” tandu iya.
