Sukat Tanah Seksyen 18: Pelin di Bau ditunda Betong

BETONG: Betong deka nunda pelin nyukat tanah adat bansa asal (NCR) nengah Seksyen 18 Kanun Tanah Sarawak ke diguna ba Bau ngambika pengawa nya lengkas tembu.

Kepala Menteri Datuk Patinggi Abang Johari Tun Openg minta Opis Residen Bagi Menua Betong numbuhka komiti khas ungkup tuju nya.

Ku iya, ba Bau pengawa nyukat digaga piak peribit lalu dikemujurka nengah Gerempung Bansa Dayak Bidayuh (DBNA) lalu sida bekerejasama enggau Opis Tanah enggau Survei (JTS).

“JTS semina ngambi penerang lot tanah. Maya JTS datai nyukat, ketuai raban bansa enggau orang ke ngempu tanah patut sama datai nentuka adan. Nya alai dalam timpuh empat bulan, 800 geran mujur digaga.

“Nya alai, aku meri terima kasih laban (kitak) ulih mayar piak peribit. Aku deka berandau enggau direktor JTS, pelin di Bau deka diguna ditu lalu aku deka meda bala ketuai raban bansa, pemenggi tanah berandau manah pasal pengawa nyukat tanah ngena Seksyen 18.

“Tau padahka nama penyanding penemu ke dipadu nyadi tukang survei awakka bisi jalai…aku setuju,” ku iya.

Iya madah munyi nya rambau sesi townhall ‘Berambeh Ngan CM Abang Jo’ dikemujurka moderator Chairman Nembiak GPS ke mega Adun Layar Gerald Rentap Jabu berimbai enggau Karnival Today for Tomorrow (T4T) renggat bagi Menua Betong di Dewan Sukan Tan Sri Datuk Amar Stephen Kalong Ningkan ditu, kemari.

Ku iya, penemu ke sebaka ari orang ke ngempu tanah beguna amat dikena nyeliahka pengawa nyukat tanah nya laun tembu.

Kenu ku Abang Johari, Perintah Sarawak udah nambah 460 pemesai JTS dikena nyaup ngelengkas pengawa nyukat tanah.