PADAWAN: Sungai Simboh ba Kampung Simboh ditu bisi pengulih ngatur aktiviti bekayuh kelimpah nyadi produk dagang temuai baru ba sitak Bidayuh Bisitang.
Kaban Parlimen Puncak Borneo, Datuk Willie Mongin madah, iya merambu pekara nya ngagai Gerempung Etnik Bisitang Kuching (PKBK) laban sungai ulih diubah nyadi palan bejalaika aktiviti ekodagang temuai.
Ku iya, Sungai Simboh diatu kamah ketegal sektor kilang ngelilingi nya lalu nya kebuah iya ransing deka nempa rampa menua ngelingi sungai nya beresi sereta meruan.
“Kitai merambu ngaga aktiviti bekayuh ba sepemanjai Sungai Simboh, belabuh ari Kampung Simboh nengah Kampung Sikog, Kampung Mambong, Rabak Asah nyentuk ke Kampung Bratan.
“Enti mujur, aktiviti tu ulih nyadi produk dagang temuai ditu lalu kitai ulih nyaga pemeruan sungai kitai,” ku iya.
Willie mansutka jaku nya ba aum pemberita pengudah ngulu licha beserimbai Pengerami Pedagang PKBK ba Palan Servis Parlimen Puncak Borneo ditu, kemari.
Diatu, ku Willie, aktiviti nya agi ba renggat perambu lalu dipejalai enda lama agi.
Iya madah, sektor kilang mega ulih meri bantu ari sukut tanggungpengawa rama korporat (CSR) enggau mantu nyaga pemeresi sungai.
“Pengawa tu dikereja ngambi sungai kitai meruan dijaga, ukai semina ungkup kitai aja tang mega ungkup rebak jemah ila,” ku iya.
Sama datai, Chairman Pengatur Karnival Orang Dagang PKBK, Fredrick Juray, Penghulu Sitak Bisitang, Dolik Sembong, kaban komiti PKBK enggau bala tuai raban bansa sitak Bidayuh Bisitang.
