KUCHING: Opis Menteri Industri Pemakai, Komoditi enggau Pemansang Wilayah Sarawak udah ngelala sitak Sungai Tunoh, Kapit nyadi umai.

Sapit Menteri iya, Datuk Dr Abdul Rahman Ismail madah, dandang pemesai 216 hektar nya engkeman enggau udah diperambu dalam rintai perambu perintah ngambi dikemansang ngena infrastruktur parit enggau entali ai.

“Opis menteri aku udah nemu pasal endur baru iya nya Sungai Entuloh, Kapit.

“Nya kebuah, Opis Betanam Betupi Sarawak benung bejalaika tungkap ba endur nya ngambi beratika pengulih nyadi umai lalu disadang tembu ba suku keterubah taun 2025,” ku iya.

Abdul Rahman mansutka jaku nya lebuh nyaut tanya Kaban Kunsil Nengeri (ADUN) Baleh, Nicholas Kudi Jantai pasal perambu iya ba sitak Tunoh tauka Entuloh, Merirai ti engkeman nyadi umai enggau tibang padi di Sarawak ba Aum Kunsil Nengeri (DUN), ditu kemari.

Adun Bukit Kota nya madah, tu seraris enggau selinting Sarawak nyapai 60 peratus Tikas Belanja Ngidupka Diri (SSL) ungkup berau manggai taun 2030.

Taja pia ku iya, bisi pemar baka infrastruktur sistem parit enggau entali ati ti enda tembu menyana, ngena benih padi varieti tradisional ti bisi asil mimit, ngena mekanisasyen enggau automasyen ladang ti baruh ngagai orang bumai, tanah dikemansang serikat peribit agi mimit enggau suntuk kereban ngetau.

Lebuh ditanya pasal sitak Merit, Baleh ti bisi pengulih ngambi dikemansang nyadi tibang padi chara komersil, iya madah, Perintah Sarawak udah ngagihka insentif ngagai orang bumai ba endur nya.

“Bisi 395 orang bumai enggau 585 orang bumai nanam padi bukit ba sitak Merit ba tanah pemesai 980 hektar udah bulih pemaik.

“Orang bumai tu nerima Skim Sum enggau Padi Perintah Besai (SBPKP) sereta Skim Sum enggau Rachun Padi Bukit (SBRPB) nengah penyampau bantu RM960,838 ungkup taun 2024,” terang iya. – SITI NURAIN RATANI