ENTI di Sarawak, kelimpah kek lapis ti nyadi kelai pengerichah Syawal, suntung mirah mega bela enda tinggal ngias mija genap kali Aidifiltri.

Nya tau dikumbai pemakai asal ti enda tau enda dinah lebuh ngelalu pengabang enggau ngabang Hari Raya.

Gempung pengasai manis, bisa enggau tekstur liat ti dichampur sambal mirah pekat nambah penyamai ngagai pengasai suntung mirah nya.

Tekstur ti liat enggau pengasai ti sebela ngasuh suntung mirah nya dikerindu ke semua serap umur.

Narit ati agi, enti dibanding lauk basah ti bukai, suntung mirah ulih digalau lama nyema disimpan enggau manah.

Nya mega ngemuntang pengempu rumah nyendia bekal suntung mirah sepanjai musin pengerami.

Lebuh Hari Raya Aidilfitri datai, suntung mirah versyen ‘ruti raya’ chukup muntang ditemu lebuh ngabang ngagai pangan diri.

MAYUH PEMINTA

Ba genturung pendiau orang berikan di Beladin, Pusa, mayuh pedagang lokal ngaga produk nya.

Siku ari sida ti nyual suntung mirah iya nya pemungkal Sotong Merah Homemade MakSue, Norina Nen tauka rindu agi dikangau Ina Seman ari Kampung Hulu Beladin.

Lebih 12 taun bejalaika dagang suntung mirah, nama iya ukai baru didinga ba peranak dia.

Genap kali Aidilfitri, iya enggau laki iya chukup kiruh nembuka lebih 2,000 bungkus suntung mirah enggau suntung pirit dikena nangkup peminta bala penguna.

“Genap kali musin pengerami, produk Sotong Merah & Sotong Pirit Homemade MakSue nerima timbal ti chukup ngemantup ati.

“Bepelasarka rikod ba taun sebedau tu, aku nerima udar urung 40 nyentuk 50 kilogram (kg) sepanjai musin pengerami lalu baka nya ga taun tu,” ku iya.

Tampung Norina, iya nyual dua bansa produk iya nya suntung mirah enggau suntung pirit. “Peminta ba produk suntung mirah mayuh agi nyentuk manggai 30 kg lalu dientudi ke suntung pirit.

“Kededua produk nya dijual enggau rega RM144 sekilogram ungkup suntung mirah lalu RM260 sekilogram ungkup suntung pirit.

“Bepanggai ba pengasai bala pemeli. Bisi nya rindu ke pengasai asal suntung pirit lalu bisi ga rindu makai suntung mirah ti bisa manis,” terang iya.

MAJAK DIKELALA

Indai lima anak ti beumur 52 taun nya madah, pengawa bejual produk suntung nya nyadi penatai pemisi iya urung 10 taun ti udah.

“Tu endang pengawa aku.

Enti musin pengerami baka Aidilfitri, penatai pemisi diulih aku deka nambah agi enti dibanding hari bukai.

“Ba hari bukai mega, aku bela beterima kasih laban agi diberi jereki ti enda kala putus. “Diatu aku semina bejual ari rumah lalu nerima udar nengah telefon.

Ungkup pemeli ti jauh, aku deka ngirum ngena servis pos.

“Ari bantu bala bakih ti nyadi ejen nyual, alhamdulillah, produk kami mujur rembus makit Semenanjung Malaysia,” ku iya.

PENGUJI

Tampung Norina, penguji besai ditapi iya lebuh ngasilka suntung mirah enggau suntung pirit iya nya ngena chara lama tang nya mih ti nyadi pengelebih ngagai produk iya.

“Laki aku deka mantu manggang suntung rangkai ngena arang sebedau dipirit ngena mesin khas.

“Ungkup suntung mirah, bisi sekeda pengawa bukai patut digaga aku.

“Aku chukup silik nyaga kualiti pengasai produk suntung aku ngambi bala pemeli enda leju sereta semampai nyukung produk aku,” ku iya.

Dikena nentuka bekal semampai chukup, Norina deka nyimpan bekal suntung rangkai tumu dikena napi peminta ti nambah ngenyit musin pengerami.

“Enti ulih, genap udar deka digaga enggau manah ngambi sida ti semak enggau jauh ulih ngasai ke ruti suntung orang Beladin,” tampung iya.

Taja pen mayuh pilih pemakai moden ti majak tebilang tang ruti suntung mirah tetap nyadi pemakai asal Aidilfitri ti dikerindu di Sarawak. Ukai semina ngembuan pengasai khas kediri empu tang mulai ke pengingat komuniti.