KUCHING: Sarawak sedia nyadi bakih strategik ngagai institusyen injiniring ari baruh Gerempung Institusyen Injiniring Asia enggau Pasifik (FEIAP) mutar chara praktikal pemar pemansag kebendar.
Premier Sarawak, Datuk Patinggi Tan Sri Abang Johari Tun Openg madah, kaul bebakih nya dikeandal meri pemaik ngagai rayat enggau rantau Asia Pasifik. Ku iya, Sarawak nerima kerejasama enggau instituasyen, universiti enggau industri ari rentayan FEIAP ngemansangka projek pemungkal ti tau diuji, disukat, dikemanah enggau dikerembai, “Aram kitai ngepunka pengawa ngena siti utai ti praktikal, siti pemar, siti pengawa bekunsi enggau siti pengawa nguji.
“Kitai sama ngelala pemar ba dunya injiniring kebendar, ngempung instituasyen ti tau disukat, dikemanah enggau direplikasyen.
“Sarawak sedia nyerungkai semua pengawa bekunsi nya,” ku iya bejaku ba mua mayuh lebuh pengawa bejadi Gempuru Besai enggau Konvensyen Gerempung Institusyen Injiniring Asia enggau Pasifik (FEIAP) di Palan Konvensyen Borneo Kuching (BCCK) kemari. Abang Johari madah baru, kerejasama nya beguna endar dikena nentuka penemu pakar injiniring ulih dikena ba pengawa mutar praktikal ti nangkup peminta rayat enggau tau dikena ba menua bukai.
Ku iya, penuduk Sarawak di Borneo mega meri peluang ngagai nengeri tu nyadi jematan penemu enggau pakar ngagai selampur ASEAN sereta rantau Asia Pasifik. “Rentayan FEIAP mega ulih meri penemu mayuh agi ngagai bala injinir biak Sarawak engah kaul enggau institusyen profesional, industri enggau bakih sama pangku pengawa ari selampur rantau tu.
“Peluang nya ulih mantu kita ngulihka peneleba, meri pengandal sereta ngerembaika perspektif antarabansa ti diguna ba ekonomi dudi hari,” ku iya.
