KUCHING: Universiti Teknologi Swinburne Kampus Sarawak (Swinburne Sarawak) deka ngepunka pengawa ngambi nembiak ungkup Program Diploma Pelajar Tumu Anak Mit (DECE) ba pun bulan September 2023.
Menteri Pemansang Indu, Anak Mit enggau Pengintu Pengelantang Komuniti (KPWK), Datuk Seri Fatimah Abdullah madah, nya pengawa ti manah laban mantu nambah kualiti pelajar tumu anak mit di Sarawak.
“Kelimpah ngemerat pengawa ngambi nembiak, silibus pelajar mega diberi perati laban beguna amat nyeridi anak maya agi mit.
“Nya kebuah, kitai deka meransang inovasyen dalam pelajar tumu anak mit ba prasekula, taska sereta tadika ba pengawa ngajar enggau belajar,” ku iya.
Fatimah mansutka jaku nya lebuh bejadi Pengawa Ngelanchar Program DECE di Universiti Teknologi Swinburne Kampus Sarawak, ditu kemari.
Ku iya, silibis program diploma ti disedia palan pelajar tinggi nya ukai semina nyendiaka kurikulum renggat nasional tang mega antarabansa.
“Pengawa nyendiaka diploma sekali ke ungkup nembiak menua tu tauka luar Sarawak deka nangkup semua kualiti diguna ngambi nembiak tu ulih gawa ba menua luar.
“Tu endang pekara baru disediaka Swinburne laban nembiak muntang agi bulih kereja ila,” terang iya.
Nangkan nya, Pro Mandal Chanselor enggau Tuai Pegawai Eksekutif Swinburne Sarawak, Ir. Professor Lau Hieng Ho madah, sida keran nyukung juluk opis menteri nya ngemanah kualiti pelajar tumu anak mit ba menua tu.
“Tu nipakka juluk Swinburne ba industri enggau kerejasama komuniti sereta nyendiaka program inovatif dikena ngubah mensia mayuh,” terang iya.
Ngelansa program diploma nya, Lau madah, ba timpuh belajar dua taun setengah nya nyengkaum dua praktikum ba taska enggau tadika.
“Nembiak mega deka bulih pelajar bekualiti tinggi enggau diaku ba tikas antarabansa laban palan pelajar tinggi tu udah nyendiaka kurikulum pelajar tumu anak mit pemadu baru Australia ba konteks Sarawak,” ku iya nyemetak.
Sama datai Sekretari Mendam KPWK Noriah Ahmad, Tuai Unit Pemansang Tumu Anak Mit KPWK, Salina Bujang sereta pengari bukai.






