KOTA KINABALU: Penatai temuai ke Sabah ditagit 2.2 juta taun tu disadang ulih nambah penatai pemisi RM4.1 bilion ungkup nengeri tu, ku Tuai Pemegai Menua Sabah, Tun Juhar Mahiruddin.
Dikena nyapai tagit nya, iya madahka Perintah Sabah keran ngeranchakka agi bemacham inisiatif enggau program dagang temuai kelebih agi promosyen dagang temuai enggau penerebai.
Ku iya, inisiatif nya mega beguna amat ngambi Sabah nyadi palan dagang temuai pemadu dikerindu ba menua tu sekali ke nya ungkup temuai dalam menua tauka temuai ari menua luar.
“Pengawa muka adan menua meri pangka positif enggau meransang pengawa nyuman sektor dagang temuai menua.
“Ba taun 2022, penatai temuai ke Sabah manggai 1.73 juta iku dibanding semina 371,187 iku ba taun sebedau tu.
“Penatai temuai antarabansa ari Singapore, Brunei, United Kingdom, Perancis enggau Belanda udah balat nambah,” ku iya bejaku beserimbai Pengawa Beradat Aum Penggal Keempat Kunsil Nengeri (DUN) Sabah Ke-16, ditu kemari.
Nambah ke nya, Tun Juhar madah, pemansang infrastruktur enggau utiliti ngembuan besai guna dikena nyukung pemansang ekonomi nengeri enggau nyaga pengelantang rayat.
Berebak enggau nya ku iya, perintah nengeri deka chakah agi bejalaika inisiatif ngemanah infrastruktur enggau utiliti nyengkaum jalai alun, bekal ai enggau bekal kuasa karan, penyangkai kapal, perengka pengangkut mensia mayuh sereta ke bukai nyengkaum ngerumban Projek Jalai Besai Pan Borneo. -BERNAMA.






