SARATOK: Sepenyampau RM25,000 diagih kena ngaga baru sambung tali karan ngagai rayat Rumah Darius, Lubok Guchi.

Sapit Menteri Pengeluar Kuasa enggau Pengeraja Asal, Ali Biju madah, penusah angus bepun ari sut tali karan ke lama nadai ditukar ngasuh kitai lenyau mayuh keresa lama nyentuk nabanka nyawa.

Ku iya, penusah baka tu kebendar ulih diseliah laban kitai udah ngelala ari ni pun utai tu tau nyadi lalu nama bagi pengawa ke patut dikereja.

“Abis nadai, enti tali karan ke lama udah ditukar, kitai ulih nyeliah penanggul sut tali karan kelebih agi ba rumah panjai.

“Ambika chunto, tali karan ke disambung dalam taun 1983 ba rumah panjai kita diatu udah manggai 37 taun lalu sigi patut ditukar.

“Kitai nemu, tali karan tu deka retai enti kelalu lama enda ditukar, nya kebuah aku ngerumban pengawa ngemendarka peminta ti dianjung kita 23 Januari taun tu tadi,” ku iya.

Ali mansutka jaku nya nengah pengari iya, pengajar William Barang ba pengawa nyuaka chek Projek Mit Pemansang Menua Pesisir (MRP) ba Rumah Darius, Lubok Guchi ditu pagi tadi,

Iya mega sedarka pemayuh kes penusah angus nuntung rumah panjai di menua tu patut diberi perati lalu diputar ngena chara pemadu manah.

Pengawa nukar tali karan tu sebagi ari inisiatif iya mantu peranak rumah panjai nyeliahka sebarang penusah bebadi enggau ungkup pengelikun sida serumah.

“Inisiatif tu beguna amat nyendiaka rumah ti likun kelimpah ari disikap latih ngena perengka pengerara api ari raban bomba.

“Reti iya, kitai naka ulih mantu genap peranak rumah panjai nyeliah enggau mutar penusah ngenyit,” ku Ali nyimpul jaku.

Berebak enggau nya, Tuai Rumah Darius meri terima kasih ngagai Ali ke udah mending enggau ngemendarka peminta sida serumah sereta meri tabi puji laban Ali udah dipadu nyadi sapit menteri ba Kabinet Perintah Besai.

Sama datai Kaunsilor Lawrence Jugi enggau bala staf Palan Servis Komuniti Sitak Parlimen Saratok.