BINTULU: Taman Negara Similajau deka ditutup sementara ngagai mensia mayuh berengkah ari 10 September 2024 nyentuk 9 March 2025.
Pengawa nutup nya ungkup bejalaika pengawa nyeleti dikena nentu taman nya semampai likun enggau meruan.
Sebengkah penerang ti dikunsi Facebook Ejensi Kampung Sarawak (SFC) madahka pengawa nutup nya ungkup bejalaika pengawa nyeleti nyengkaum nambah infrastruktur enggau fasiliti ba taman nya.
“Kami ngarap pengawa nambah infrastruktur enggau fasiliti tu deka meri peneleba ti manah agi sereta ngemantupka ati bala pengusung nyema taman tu udah dibuka baru ila,” ku penerang nya.
Berebak enggau nya, SFC minta ampun ngagai mensia mayuh ketegal pekara nya sereta ngarapka sida mereti enggau meri sukung tegut.
“Pangku pengawa kami iya nya ngintu jelu siga enggau pemanah rampa menua ba taman tu,” tampung penerang nya.
Mensia mayuh ti deka nemu silik pasal pekara nya diperansang betelefon ngagai SFC ba lumur 086-339842 tauka 082-610088.
