SARIKEI: Tamu Sarikei ditutup sekumbang Atur Nagang Pejalai diterit nyentuk 31 March dikena nagang pengerekai igi penyakit Covid-19.

Chairman Kaunsil Pelilih Sarikei (MDS), Wong Zee Yeng, madah, pengawa tu dipejalai berindik ari gerah Opis Menteri Kaunsil Kandang Menua enggau Pengawa Berumah Sarawak enggau Komiti Penyangga Penusah Ngenyit Nengeri (JPBN) Sarawak.

Ku iya, tamu ke dibaruh pegai MDS iya nya Tamu Minggu Sarikei (laman endur paking kerita makit Sentral) enggau Tamu Sentral.

“Pengawa tu dipejalai dikena nyaga pengelikun mensia mayuh laban tamu tu endur ditapatka mensia mayuh kelebih agi maya ujung minggu.

“Berindik ari nya, kitai beterima kasih ke kerejasama semua piak,” ku iya lebuh dirandau.