KUCHING: Sekretari Politik Premier Sarawak, Tan Kai mujur dipadu nyadi Chairman Kaunsil Mengeri Padawan (MPP) ti baru ungkup taun 2023-2025.
Tan Kai dipadu nganti ex-Chairman MPP iya nya Adun Batu Kitang, Lo Khere Chiang.
Pengawa angkat sumpah nyadi chairman nya dikemataka Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal, Datuk Seri Dr Sim Kui Hian ba Balai Besai MPP, ditu tadi.
Lebuh bejaku ba program nya, Tan Kai madah, MPP disadang deka napi pemar baru ti nuntung menua nyengkaum gaya trafik penyekut jalai alun, penyadi penusah bah ketegal ubah gaya hari ti semampai berubah enggau pemansang menua.
“Nya alai, MPP patut ngembuan pengering ngambi regas napi semua pemar tu lalu mutarka penanggul kelimpah ngatur kerejasama rat enggau ejensi perintah.
“Aku ngembuan visyen deka ngedutka takah entara MPP enggau rayat menua kelimpah ngemanahka sekeda palan nyadi palan dagang temuai.
“Aku mega andal MPP seruran nampung pengawa nyeruri perengkaguna ti kondusif ngambi sitak tu ulih narit bala pedagang enggau pengawa berumah,” ku iya.
