KUCHING: Perintah Sarawak ngagih RM23,425,726.90 dikena mayar pampas tanah ngagai 70 penerima ari Sungai Batu Depot.
Sapit Premier Sarawak, Datuk Amar Awang Tengah Ali Hasan, madah pampas nya dibayar ngagai sida ke kena renchah Projek Pemansang Pengangkut Mensia Mayuh enggau Autonomous Rail Rapid Transit (ART).
Ku iya, penyampau pampas ke dibayar endang nitih rega ke patut pengudah ditisih Opis Tanah enggau Survey (JTS) Sarawak bepelasarka utai tanam, struktur rumah enggau pemesai tanah ke kena renchah.
“Bisi 81 chek udah disua ngagai sida ke kena renchah projek pemansang infrastruktur tu.
“Perintah Sarawak ngambi tanah laban bisi projek deka dipejalai dia lalu tanah ke diambi nya endang deka dibayar, ukai diambi pia aja.
“Pampas ke dibayar mega nitih atur ke bisi dalam Kanun Tanah Negeri Bab 81 enggau Pekara 13 Konstitusyen Perintah Besai nyengkaum ba tanah Adat Bansa Asal (NCR).
“Rega tanah mega udah niki enti dibanding bepuluh taun ke udah ketegal langgur pemansang dipejalai perintah,” ku iya.
Awang Tengah bejaku munyi nya lebuh dipebasa bejadi pengawa nyua chek pampas tanah nya di Dewan Auditorium Begunan Yayasan Sarawak ditu ensanus.
Iya ke mega Menteri Pengeraja Asal enggau Pemansang Mengeri Sarawak ngarapka semua penerima ngena manah bayar pampas diterima sida.
“Kena duit tu ungkup pelajar bala anak nentuka sida ulih besekula enggau menyana laban jeman diatu nyau jauh berubah.
“Bala pemeranak puku ari menua tu enggau menua luar mega nyau mayuh datai beranakka puku ngena bemacham teknologi baru.
“Nya alai, kita patut ngena manah peluang ke bisi ngemajuka diri enggau ruang bilik,” ku iya.
Awang Tengah madah baru, inisiatif nya mega mandangka Perintah Sarawak seruran naka ulih nyendia perengkaguna ungkup rayat ngambi nadai siku ngasaika diri dikelaung ari pemansang.
Sama datai, Menteri Pemansang Indu, Ruang Bilik enggau Komuniti, Datuk Seri Nancy Shukri, Sapit Menteri Utiliti enggau Telekomunikasyen Sarawak, Datuk Dr Abdul Rahman Junaidi, Direktor Tanah enggau Survey Sarawak, Datuk Abdullah Julaihi, Penguasa Tanah enggau Survey Sarawak Bagi Menua Kuching, Sr Alfian Bawi enggau bala bukai.






