Tanah endur ngaga pemansang tetap dipampas

BETONG: Perintah Gempung Parti Sarawak sigi enda ngambi ngapa tanah rayat sengapa enti nadai enggau pampas.

Kaban Kaunsil Nengeri (Adun) Layar Gerald Rentap Jabu madah,genap tanah diambi perintah dikena ngaga pemansang infrastruktur endang deka dibayar pampas magang.

“Perintah enda sesekali ngambi tanah rayat enggau nadai beradat. Kelimpah tuju dikena ngaga pemansang ti mai pemaik ungkup rayat mega.

“Laban endang udah tanggungpengawa perintah meri pemansang ungkup rayat awakka sida ulih sama ngasai buah pemansang,”

“Nya alai, rayat mega meseti meretika tuju perintah ngambi tanah sida awakka pulai ke pengelantang sida jemah,”ku iya.

Gerald madah munyi nya lebuh bejaku maya bejadi Program Nyua Cek Pampas Tanah Ungkup Projek Rayat 2019 Pelilih Betong ba Dewan Layar ditu kena 28 Feb tu tadi.

Ku iya, tu mega mandangka perintah ukai ngerampas tanah rayat enggau enda beradat munyi ke disebut sekeda piak ngelama tu.

“Genap tanah rayat ke alai perintah ngaga pemansang sigi deka nerima bayar pampas enggau patut nitih undang-undang,”

“Tu seriris enggau Kanun Tanah Nengeri (Bab 81) enggau Pekara 13 Perlembagaan Persekutuan ti madahka nadai siku peranak menua ulih dirampas reta iya enti nadai nengah undang-undang,”

“Ke mega nadai undang-undang ngemendar ngerampas, ngambi, mejal tauka ngena reta pesaka orang bukai enti nadai enggau pampas ti patut,”ku iya.

Nambah nya ku iya, ambika chunto langgur Projek Ngaga Padang Bilun Bukit Sadok endang besai guna ungkup peranak menua besemak.

Nangkan nya ku iya,projek pemansang baka tu mega mandangka perintah GPS Sarawak seruran lalu semampai nguji mai pemansang ungkup peranak menua pesisir.

“Pemendar perintah ngatur pemansang ke baka tu laban deka meda nengeri Sarawak ulih maju sereta ulih mega ngubah nengeri Sarawak nyadi siti nengeri dagang bepelasarka ekonomi digital jemah,”ku iya.

Ungkup penerang,sepenyampau 144 mensia mayuh peranak Layar (Betong) nerima pampas tanah sida laban Projek Ngaga Baru Padang Bilun Bukit Sadok,jalai kedua Sarawak Trunk Road (pakej B4),Projek Jematan Batang Lupar No.2,Projek Jalai Sekatap/Meribong/Nanga Jelau/Jelau Atas/Batu Lintang,Betong enggau penyampau semua iya nya RM 8,347,092.01.

Sama datai ngulu program iya nya Pemesai JTS Betong Anthony Aboi,Pemesai Pelilih Betong Softhi Jebal, Pengari Residen Betong Akoi Ejau sereta ketuai raban bansa besemak.

Suara Sarawak