BETONG: Perintah Sarawak ngemendarka pengawa nyukat Tanah Adat Bansa Asal (NCR) urung 2,110 hektar pemesai enggi peranak Lempaong Anyut ba menua Paku.

Sapit Premier Sarawak, Datuk Amar Douglas Uggah Embas madah, inisiatif nya nangkup peminta peranak dia ti dekaka tanah NCR sida diaku nengah pengawa nyukat kelingi ti dikemendar.

“Pengawa ti dikemendar ngaul peminta ngena Seksyen Enam Kanun Tanah Sarawak sebedau meri pala tanah ngena Seksyen 18 kanun ti sebaka.

“Opis Tanah enggau Servey (JTS) Bagi Menua Betong udah diberi penerang pasal peminta sida ti udah dikemendar,” ku iya.

Uggah bekunsi berita manah nya lebuh ngulu Penerang Inisiatif Baru Tanah NCR di Rumah Panjai Lempaong Anyut, Paku, kilah ensanus. Iya madah baru, inisiatif nya nampung projek pemungkal di Ulu Paku lalu diatur dikerembai ngagai tujuh rumah panjai di menua Anyut, iya nya Lempaong Anyut, Lingit, Engkerebai, Jitu, Nanam, Udau enggau Sungai Rian. Dulu ari nya ba sesyen randau begulai enggau peranak, dia bala tuai rumah enggau komuniti menua nya sama diberi peluang betanya enggau mending penerang silik bekaul atur baru nyukat tanah NCR.

Kaban Kunsil Nengeri (ADUN) Bukit Saban nya mega nyemetak madah, inisiatif nya nyata mandangka pengelurus enggau pengeran Perintah Sarawak negap penuduk pengempu tanah adat. “Perintah Gempung Parti Sarawak (GPS) seruran mantu pengempu tanah NCR ngulihka hak sida. “Tanah adat ti empai bisi pala deka diberi. Tu nyata mandangka pengeran perintah mantu rayat,” ku iya nyemetak.

Berebak enggau nya, Uggah ngansak peranak nentuka nadai laya betalatka tanah ti tau ngasuh pengawa nyukat kelingi sereta nukar status hak ngempu tanah lubah diadu. Kaban Parlimen Betong, Datuk Dr. Richard Rapu, Penguasa Tanah enggau Survei Bagi Menua Betong, TPr Moris Nayup enggau Sekretari Politik Premier Sarawak, Roseline Mapong Sabai sama bisi datai. OSMAN RAZALI