BETONG: Dua penusah tanah tusur nuntung dua buah rumah panjai bebida semak Ulu Layar ditu, kemari.
Tuai Bomba enggau Penyah Penusah Betong Vincent Baling Yabi ngenukuka endur penusah keterubah nyadi ba Rumah Sanda ba Jambu Kerampak.
Ba penusah nya ku iya, ujung bilik sebuah rumah nyembuah ti diuan dua iku nyau rarat ditabanka tanah tusur kira 30×10 meter persegi pemesai.
“Seraya penusah kedua nyadi ba Rumah Panjai Adal, Nanga Tiga ke alai empat ari 30 pintu bilik tasah ketegal tanah tusur.
“Sida empat pintu ke tasah nya berimbai iya nya bilik lumur 10, 11, 12 enggau 13 lalu penyampau tubuh sida ke diau dia bisi 13 iku.
“Pengudah diperesa, kami beratika dinding belakang dapur kena lamun tanah tusur seraya atap rumah rusak ketegal ditinggang pun kayu,” terang iya.
Berindik ari nya, Vincent ngelalau peranak dia ngelaungka endur tanah tusur lalu seruran bejaga enti sema ujan bangat majak nyadi. – OSMAN RAZALI
