MIRI: Tukun gaga diengkah dalam tasik Sarawak ari Tanjung Datu nyentuk ke Lawas diaku nyadi tukun gaga pemadu panjai di dunya nitih ke data artificial ari Serakup Tukun Gaga di Florida, Amerika Syarikat.
Premier Sarawak Datuk Patinggi Tan Sri Abang Johari Tun Openg madah, serakup nya meri aku laban pemanjai tukun gaga ti diengkah dalam tasik di Sarawak tu bisi 746 kilometer.
“Pekara ti deka dikunsi aku ditu iya nya lebuh kitai ngengkahka tukun gaga ba tasik, kitai deka meri endur ngagai utai tumbuh marin sereta nambah pengaya biodiversiti di kandang tasik Sarawak.
“Penyampau utai idup ba tasik ti nambah baka ikan udah meri penguntung ngagai raban orang berikan di Saribas nyentuk ke Mukah lebuh penatai pemisi sida mega nambah,” ku iya.
Abang Johari bejaku munyi nya rambau Ngelancharka Kapal Penginau Laju Kelas Pulau Sarawak Coastguard enggau Bejadi Markas Unit Pengelikun enggau Penerit Adat Sarawak (UKPS) ditu, kemari.
Ku iya, pemaik diulih ari pengawa ngintu enggau nyaga pemeruan kandang tebing tasik nengah tukun gaga siti chara baru ti udah mantu Sarawak.
“Kami udah ngagihka RM77 juta dikena nyaga kandang tebing tasik enggau pengelikun awak enda ulih dikeruga sengapa.
“Aku meri terima kasih ngagai Perintah Besai ti udah meri kerejasama nyaga pengelikun kandang tasik kitai, tang kitai enda ulih kelalu ngandalka Perintah Besai.
“Nya kebuah, kitai nyerariska pengawa nyaga kandang tasik tu enggau penatai pemisi dikena ngelempungka tating belanja awak meri servis ti manah ngagai rayat.
“Aku pechaya semina Sarawak aja bisi ejensi ti nyaga kandang tebing tasik baka tu, laban nadai orang bukai ulih nyaga pengelikun kitai enti enda kitai empu,” ku iya.
