PELILIH Bau, Kuching ngembuan bemacham palan ngelantang ati lalu siti ari palan nya baka Tasik Biru tauka Blue Lake.

Tasik Biru chukup muntang dilawa laban bepalan ba sepiak Pasar Bau urung dua minit ari tengah pasar nya.

Taja pia, enti pejalai ngena entukar ari indu mengeri Kuching nuju tasik nya ngambi timpuh urung 40 minit tauka 35 kilometer penyauh.

Ari sukut sejarah, palan nya endang tebilang enggau pengawa ngeluyang emas ba tengan taun 90-an nyentuk pun taun 2000.

Nya alai, tasik nya ukai tasik asal ti nyadi ba palan nya tang nyadi berebak ari pengawa ngeluyang emas.

Pengudah pengawa ngeluyang emas tembu dipejalai, dia deh palan nya diangkat nyadi siti palan dagang temuai ti chukup tebilang ba Bau.

Sebedau diberi nama Tasik Biru, nama asal tasik nya Tai Parit ba jaku China Hakka ti mai reti ‘parit besai’.

Tang nyau pengelama pengudah nya, tasik nya lalu diberi nama Tasik Biru laban gaya ai ba tasik nya ti bechura biru.

Palan nya suah ditapatka mensia mayuh laban ngembuan rampa menua ti chukup manah kelimpah mayuh aktiviti ngelantang ati bisi diatur dia.

Bayar tama ngagai Tasik Biru iya nya RM10 ungkup orang besai tuai enggau RM5 ungkup nembiak mit sereta bisi diberi ai irup pechuma.

Ngelansa silik senentang ai irup pechuma nya, orang besai tuai deka diberi dua tin ai irup lalu nembiak mit semina setin ai irup ba Roxy Rock Café.

Mensia mayuh ti tama ngagai palan nya bepeluang bejalai nengah jematan melepung ngelayang tasik sereta mayuh endur begambar ti manah.

Entara aktiviti ti bisi disedia ba tasik nya baka nepan bot, ngayuhka basikal ai, paddling boat, bekayuh ngena kayak enggau ti bukai.

Tasik Biru berengkah beoperasyen ari pukul 10 pagi nyentuk 6 lemai ninting Hari Satu nyentuk Hari Lima.

Enti ujung minggu baka Hari Enam enggau Hari Minggu nyengkaum hari besai, palan nya deka dibuka tumu agi iya nya pukul 9 pagi nyentuk 6 lemai.

Nambahka nya, mensia mayuh ti deka bemalam ba tasik nya bepeluang bemalam ba Chalet Melepung Hotel Roxy Tasik Biru ti bepalan ba seberai tasik nya.

Chalet nya nunga ngagai Tasik Biru, nya alai, sida ti bemalam dia bepeluang nimpai pemanah rampa menua ba tasik nya enggau lenak agi kelimpah bepeluang mandi ba Tasik Biru.

Mensia mayuh ti deka nemu silik tauka nempah bilik chalet nya diperansang ngelawa website Hotel Roxy.

Ukai naka nya aja, Tasik Biru mega chukup richah laban mayuh orang bedajaka bemacham utai dempa, ai irup, panggang, kuie enggau kraf jari ba tebing tasik nya.