SIBU: Orang bekebun, betanam betupi enggau orang berikan tau bejual ba makit ke udah ditetap piak kaunsil kandang menua (PBT).
Pemutus tu digaga kilah ensana (26 March 2020) nengah aum Komiti Khas Pengelikun Nengeri Sarawak ti betuaika Kepala Menteri Datuk Patinggi Abang Johari Tun Abang Openg.
“Orang bekebun, betanam betupi enggau orang berikan dikemendarka nyual asil sida ba endur ti udah ditetapka Kaunsil Perintah Menua.
“Timpuh alai bejual iya nya ari 7 pagi nyentuk pukul 7 lemai,” pia ku penerang dikeluarka Sekretariat Komiti Penyanga Penusah Negeri, kilah ensana.
Ba aum nya, Abang Johari netapka nengeri tu enda suntuk bekal pemakai taja menua benung bejalaika PKP.
Tu ngujungka pemutus raban ke bejual nya diberi pemendar nyual asil sida.
Sebedau atur tu diputuska, viral ba laman rama ngayanka siku indai tuai ngelaban raban penerit adat bejalaika pengawa matau Atur Pejalai Betagang (PKP) ba sebengkah makit di Sibu.
Tebal agi mensia mayuh ti mantaika penemu ba laman rama enda setujuka ulah indai tuai nya.
