Tau idupka baru Sarawak Renjer – SCPA

KUCHING: Gerempung Komuniti Polis Sarawak (SCPA) minta Perintah Besai berundingka penemu ngidupka baru Sarawak Renjer awakka ulih mantu matau adan nengeri tu enggau Kalimantan.
Chairman SCPA Datuk Seri Victor Hii madah, nya kebendar manah laban ulih nyendiaka mayuh pengawa puang ngagai rayat Sarawak kelimpah negapka pengelikun ba adan menua.
Iya madah munyi nya lalu betugang sukung ngagai perambu Sapit Kepala Menteri Tan Sri Datuk Amar Dr James Jemut Masing ti deka ngaga pagar tauka dinding besai ba palan strategik di sepanjai 1,032 kilometer adan menua Sarawak enggau Kalimantan.
“Ba taun 2015 suba, ex-Sapit Menteri Dalam Menua Datuk Seri Wan Junaidi Tuanku Jaafar mega kala mansutka ripot pansik ke bedau dikenuku mandangka penyampau kampar ke Sarawak entara 320,000 enggau 350,000.
“Sehari tu, nyangka penyampau kampar ke gawa ba Sarawak nyau manggai 500,000 tauka lebih,” ku iya madah nengah sebengkah penerang, kemari.
Ku iya, kelimpag ngidupka baru Sarawak Renjer nyadi alternatif nagang penatai kampar, patut mega bisi kerejasama entara perintah nengeri enggau perintah besai dikena nentuka bisi atur pengelikun ditegap ba sepanjai adan menua.
“Dikena nyukung pekara nya, perintah patut nambahka agi penyampau pengereja pengawa nyengkaum raban ke mai senapang, polis, Ejensi Penerit Adat Maritim Malaysia (APMM) enggau ejensi bukai bekaul enggau pengawa nyaga adan menua.
“Kelimpah ari nya, pengelikun ba adan menua ulih ditegap nengah pengawa nyendiaka kereban teknologi moden enggau ngemanahka perengka infrastruktur baka jalai dikena ngemuntangka pejalai pengawa matau.
“Pengawa nguna teknologi AI kebendar ulih negapka agi pengelikun ba adan menua sereta nyekat raban kampar ti deka tama belalai,” ku iya.
Ku iya, teknologi nya mungkur kamera enggau sensor ke muat AI dikena nyidi pejalai, drone pematau enggau beratika sitak dara dalam radius 30km enggau teknologi biometrik baka ngelala mua orang kampar ke tama nadai pemendar.
“Mensia mayuh mega ulih nyaup pengawa tu, nyema sida bisi meda sebarang pengawa ke nyelai, palan endur belalai tauka ulih meri sebarang penerang ngagai raban penerit adat.
“Taja kitai nemu penguntung ngambi pengereja pengawa luar mantu aktiviti ekonomi Malaysia dalam sektor intensif kunterikta baka kenun besai, ngaga rumah enggau kilang, tang pengaji mesti diajar ngena pengereja pengawa ke nitih jalai ke betul awakka sida enda kena ukum dibaruh undang-undang,” ku iya.
Iya madah beguna amat pengaji ngambi pengereja pengawa ke udah diaku laban nya mantu nentuka pengelikun enggau pengelantang rayat Sarawak.