Entara perengka muzik asal ke patut diibun manah
INFO
Tawak dipangkung lebuh bisi pemati enggau bisi orang sakit mega deka dipalu enda tau berentak laban bebasaka orang ti ngempu penusah
KUCHING: Tawak entara kereban muzik asal ke seruran diguna ninting kali bejadi sesebengkah pengerami ba komuniti di menua tu.
Pia mega ba raban bansa Bidayuh tawak meruan diibun manah nyadika pesaka sereta diguna maya ngintu pengerami Hari Gawai.
Lebuh pengerami Hari Gawai Dayak Renggat Nengeri di Bau apin lama gerempung tu udah nyadi champion bepekit nebah tawak.
Suara Sarawak sempat ngambi awak nanya ketuai tim sida iya nya Jiwey Rigen, 55 taun bekaul enggau tawak.
Ku iya, lebuh maya pengerami Hari Gawai Dayak di Kampung Opar sida deka ngantung tawak ba Rumah Gawai sepengelama seminggu dibantai ngagai mensia mayuh.
“Maya nya sapa-sapa nembiak ti rindu deka malu tawak sigi diasuh mangkung baik lelaki tauka indu.
“Udah sida nemu mangkung baru kami nyeridi sida malu ngena chara tauka teknik ti betul lalu,” ku iya.
Kelimpah nya, ku iya kelia tawak dikena lebuh maya Hari Gawai Dayak (Adat Gawea Sowa’), Gawai Muka Jalai (Gawai Olan), maya bisi pemati enggau berubat chara lama.
“Enda semua Gawai diintu meseti ngena tawak laban tawak tu enda tau dipalu sengapa.
“Lebuh deka bumai kami deka Gawai Olan dalam bulan Julai, lalu ngagai ujung bulan June iya nya Gawai Sawo’.
“Lebuh bisi pemati enggau berubat chara lama, bunyi pangkung tawak deka bebida ari pangkung maya hari Gawai.
Jiwey madah, tawak dipangkung lebuh bisi pemati enggau bisi orang sakit mega deka dipalu enda tau berentak laban bebasaka orang ti ngempu penusah.
“Semina bujang berani aja tau mangkung tawak lebuh bisi dituntung penusah baka pemati enggau ngubat orang ti sakit.
“Tang lebuh Hari Gawai sapa-sapa aja tau mangkung tawak laban nya pengerami asal.
“Rentak sereta bunyi tawak deka nyamai didinga enti diseretaka enggau tetawak (bebendai), terenek, krumuang, canang enggau sidabad,”ku iya.
Nangkan nya, iya madah kediatu mayuh orang ngena tawak lebuh nyambut bala pemesai baka sida menteri enggau orang ti bepangkat tinggi.
“Aku ngarapka seni sereta main asal bansa Dayak enda lenyau.
“Pia mega bunyi enggau rentak tawak patut enda berubah ngambika bala nembiak baru bisi ngembuan pengerindu dalam main asal tu,” ku lalau iya.
