KUCHING: Presiden Raban Bola Sepak Sarawak (FAS) Datuk Posa Majais madah nadai pematut iya minta ampun ngagai Razali Dolhan sereta narit pulai dawa ti bekaul enggau ulah ngelesapka duit RM500,000.
Posa lebuh dirandau Suara Sarawak madah nadai masuk runding FAS patut minta ampun ngagai Razali.
“Nama tuju semua nya patut dibai ngagai kort, tejuka sida Komiti Nagang Makai Suap Malaysia (SPRM) mansik bukti ke udah diberi ,” ku iya.
Iya nambah, pengawa minta ampun ngagai Razali nya enda betul laban bukti ngelesapka duit udah diserah ngagai SPRM ngambika dipansik.
Ku Posa, FAS nganti timbal ari SPRM pengudah meri bukti bekaul enggau pengawa salah Razali Dolhan ba taun 2017.
Udah nya, ba siti ripot surat kabar dalam menua kemari, Razali meri timpuh seminggu ngagai Presiden FAS Datuk Posa minta ampun laban udah nuduh iya.
Ramli begulai enggau luyar iya Dominic Ng madah deka neritka atur undang-undang ngagai piak ke udah nuduh iya.
Razali dituduh ngereja penyalah nya leuh iya agi megai tanggungpengawa nyadi Sekretari Besai FAS ba taun 2017.
Ripot SPRM udah digaga Posa kena Hari Lima pukul 9.30 pagi, begulai enggau Sekretari Besai FAS ke baru, Jefry Lana.
Entara kes ngelesapka duit ti digaga Razali nyengkaum ngaga peminta palsu ti enda masuk runding, kelimpah asil duit gumpul ari rega tiket pekit ti enda dipasuk ngagai akaun gerempung nya.
