MARUDI: Premier Sarawak, Datuk Patinggi Tan Sri Abang Johari Tun Openg madahka diri merambu ngaga tekat ai mit ba Baram nyadi sebengkah chara dikena ngasilka kuasa karan.

Ku iya, perambu nya mansa ba runding iya lebuh ngenang aktiviti mensia mayuh ba sungai majak kurang ketegal jalai alun udah mayuh tembu digaga.

“Lebuh orang enda ngena sungai agi, tu deka ngujung ke penyampau jagu ba sungai menua kitai nambah.

“Tu nyadi pekara ti dikenangi aku laban sida madah diatu jagu udah bisi dipeda ayan ba Sungai Baleh din,” ku iya.

Abang Johari mansutka jaku nya rambau bejadi pengawa nasih tanah Hotel Marudi ba Balai Suarah Marudi ditu, sehari tu.

Ku iya, rayat ngelingi kandang menua nya deka bulih pemaik ari perambu nya ila baka bulih bekal kuasa karan ti meruan, ngerembaika aktiviti berikan lalu jagu enggai agi diau ba sungai sida.

“Turbin tekat tu bepusin baka dinamo basikal sereta ulih nyendia 500 megawatt tauka 1,000 megawatt bekal kuasa karan ti enda ngeruga rampa menua.

“Kitai pen enda ibuh ngampuhka kandang menua tauka tanah darat baka chara kelia, semina ngena pemisi ti diberi Tuhan iya nya sungai.

“Diatu kitai, semina ngaga tekat aja, lebuh tekat udah bisi, palan nya deka baka ai wung,” ku iya.