KUCHING: Sarawak diatu benung nyingkang nyadi palan singka miga enggau teknologi tinggi ti dipebasa ba renggat serantau enggau antarabansa dikena nyerungkai sektor ti meri empas tinggi baka singka miga, kuasa gadung enggau ekonomi digital.
Tuai Pemegai Menua (TYT) Sarawak, Tun Pehin Sri Wan Junaidi Tuanku Jaafar madah, pengeransing nya ulih ngerandang peluang baru ba pemansang ekonomi menua kelimpah ari nyendia mayuh agi peluang gawa, kelebih agi ungkup raban profesional enggau pengereja landik.
“Industri singka miga mungkur bemacham bidang strategik baka pengawa ngasilka kereban miki bilun, ngintu bilun, teknologi satelit, teknologi dron enggau ekonomi digital ti nyadi pemansut besai pemansang Sarawak jemah.
“Pemansang sektor tu mega ngasuh Sarawak ulih nguasa sereta nyimpan data enggau penerang perintah dikena nentuka pengelikun enggau peminta nengeri enggau rayat,” ku iya.
Tun Wan Junaidi nyebut jaku nya lebuh bejadi Aum Keterubah Penggal Kelima Kunsil Nengeri (DUN) Sarawak Ke-19, ditu, kemari.
Ku iya, kerejasama entara perintah, institusyen pelajar, opis menteri bekaul, gerempung profesional enggau sektor industri patut ditegap nentuka pemansang modal mensia nengeri tu amat tetangkup ke peminta industri teknologi tinggi ti majak deras.
“Palan pelajar tinggi enggau palan Pelajar Latih Teknikal enggau Vokasional (TVET) enda ulih mansang kediri, tang begunaka kerejasama strategik enggau industri sereta staf profesional dikena nempa raban bepenau ti bisi kualiti, relevan enggau nangkup peminta makit.
“Latih pengelandik enggau penau ti dikerembai meseti ulih nangkup guna industri ngambi Sarawak ngembuan pengereja pengawa ti kompetitif ba renggat global,” ku iya.
Iya nyemetak madah, pemujur Sarawak ba industri teknologi tinggi baka singka miga, kuasa gadung enggau ekonomi digital endang bepanggai ba pengereja landik menua.
Ku iya, nya ukai semina bepanggai ba polisi perintah aja, tang mega ba pengelebih nempa pengereja landik ti ulih nyingkang nitih pemansang teknologi dunya.
“Nya alai, opis menteri pelajar, palan pelajar tinggi enggau TVET nyadi pemansang besai dikena ngamatka juluk perintah deka nempa Sarawak nyadi nengeri maju bepelasarka teknologi tinggi.
“Nengah pelajar enggau latih ti chukup, peranak Sarawak ulih besemekih ngena pengelandik sereta setikas enggau pengulih raban profesional ari menua bukai ba bidang teknologi, inovasyen enggau singka miga.
“Pengawa tu ulih nyagu Sarawak nyadi siti ari palan pemansang industri singka miga enggau teknologi tinggi ti dipebasa ba tikas serantau enggau antarabansa,” ku iya.
