JIPUN: Sarawak terus negap agenda transformasyen betanam betupi meruan nunda inovasyen betanam betupi ngena teknologi ari Jipun.
Menteri Industri Pemakai, Komoditi enggau Pemansang Kandang Menua Sarawak, Datuk Seri Dr. Stephen Rundi Utom madah, teknologi dikena ba menua nya mega manah ke rampa menua ba menua nya.
Ku iya, model betanam betupi pintar Jipun nya udah nyata mandangka teknologi enggau pemeruan ulih digaga begulai dikena negap jamin bekal pemakai global.
“Aeon Agri Create nunjukka betanam betupi tu ulih dikereja enggau sikar sereta bisi tanggungpengawa.
“Tu nyadi chunto ti meri peransang ngagai Sarawak lebuh kitai ngatur pengawa numbuh ekosistem agro-industri moden manggai 2030,” terang iya.
Rundi nerang pekara nya lebuh ngetuai ke diligit Opis Menteri Industri Pemakai, Komoditi enggau Pemansang Kandang Menua Sarawak (M-FICORD) menteri iya penemuai gawa ke Aeon Agri Create Co. Ltd. di Bandar Kuki, Kandang Menua Saitama Jipun, empai lama.
Penemuai gawa nya sebagi ari misyen tungkap Sarawak nyerungkai model betanam betupi rebak baru ti ngena integrasyen digital, penyikar pengereja enggau pengawa meruan, seriris enggau pengawa nengeri nuju industri agro-industri moden manggai 2030.
Di Saitama Kuki Farm, perengkaguna 3.3 hektar pemesai ti diatur Aeon Group, dia tomato ditanam ngena sistem Probioponik, iya nya chara hidroponik organik ti nyilih sum kimia enggau nutrien digaga ari biojisim.
Teknologi nya dikemansang begulai Asahi Kasei Corporation nengah pelasar Nature Ponics , ti ulih ngaga ai nutrien chara automatik ari teda pemakai seraya ngena manah pengangat pelet kayu ngambi enda kelalu bepanggai ba bahan api fosil.
Ari begulaika automasyen, ngintu kuasa enggau betanam betupi ti tegap, ladang nya nyapai tikas produktiviti tinggi enggau juluk mansutka urung 990 tan tomato setaun, jauh ngelui ari asil ladang konvensional.
Perengkaguna tu mega udah nerima setipikit GLOBALG.A.P. dan GRASP, dikena ngaku pengeran meri jamin bekal pemakai, ngintu pengelantang pengereja enggau ngintu rampa menua.
Iya mega nerang, M-FICORD deka nyerungkai pengulih kerejasama enggau institusyen sereta kompeni Jipun ngambi nipakka inovasyen biojisim, sistem rumah kibung pintar enggau sum organik ti engkeman enggau rampa menua tropika Sarawak.
“Betanam betupi diatu ukai semina pasal pengawa asal kitai aja, tang pasal data, sains enggau inovasyen. “Pekara ti diperati ke kitai di Saitama iya nya demonstrasyen kebendar baka ni jamin bekal pemakai enggau pemeruan ulih diadu seretai,” ku iya.
Aeon Agri Create, ti ditumbuh ba taun 2009 di baruh konglomerat renchit Aeon Co. Ltd., diatu ngatur lebih 20 ladang di selampur Jipun, meri bekal asil idup terus ke rentayan makit besai Aeon di selampur menua. Sama nemuai gawa, Sapit Menteri M-FICORD, Datuk Martin Ben, sereta Direktor Opis Betanam Betupi Sarawak, Dominic Chunggat. —EDISI UKAS
