KUCHING: Perintah naka ulih negap sektor industri lada nengah pengawa ngena teknologi moden dikena nambah semekih enggau pemansang.
Menteri Pengawa Bekebun Bedandang Besai enggau Komoditi, Datuk Seri Dr. Noraini Ahmad madah, industri lada menua terus ditegap nengah pengawa nambah produktiviti, ngena teknologi moden sereta ngerembai makit global.
“Dikena napi pemar baka ubah klimet, rega ti enda tentu enggau begunaka kualiti tinggi, teknologi ukai agi pilih tang siti pekara ti diguna nentuka industri lada mengkang meruan enggau besemekih.
“Nya kebuah, perintah naka ulih nentuka sektor lada terus dikemansang nyadi sektor mit agrikomoditi berega nengah nambah produktiviti, negap teknologi sereta akses makit antarabansa,” ku iya.
Nangkan nya, iya bisi limpang ngabas taba fasiliti nginjin lada sereta makmal Kaunsil Lada Malaysia (MPB) ti nyadi palan aktiviti nginjin, matau kualiti enggau pansik industri lada menua.
Iya mega bisi ngabas dua loji baru MPB iya nya Loji Nginjin Fizikal (Nginjin Lada Rangkai enggau Basah) enggau Loji Nisih Chura baru.
Ba pekara bukai, Noraini madah ke industri lada Malaysia majak ngerembai ti nyungkak Pemansut Kasar Dalam Menua (KDNK).
Ku iya, industri lada udah nambah urung RM2.27 juta tauka 0.13 peratus KDNK ba taun 2025 dibanding RM2.24 juta (0.14 peratus) ba taun ti dulu.
“Nyentuk ujung taun 2025, pemesai dandang nanam lada di Malaysia dipelaba urung 8,200 hektar lalu pemansut mayuh datai ari Sarawak.
“Industri tu mega disukung urung 39,000 pekebun lalu beguna endar dikena nyungkak ekonomi komuniti menua pesisir,” ku iya.
Ngenang silik, Malaysia ngerikod eksport komoditi lada sepenyampau 4,344 tan metrik lada lalu berega urung RM179 juta ba taun 2025, mandangka lada bekualiti tinggi ari Malaysia nerima peminta tinggi ba makit global.
“Inisiatif bepelasarka inovasyen enggau rentayan rega meseti terus ditegap pemekuh industri lada, nyengkaum pemansang produk ili enggau ngaga chap dagang ti strategik agi dikena nambah semekih industri,” ku iya.
