KUCHING: Peranak Kuching ke apin nerima bantu tauka suntuk barang pemakai diperansang betelefon nuju Komiti Penyangga Penusah Ngenyit Bagi Menua (DDMC) Kuching. Naka tu penyampau 62,777 Ketuai Bilik (KIR) udah nerima bantu pemakai ari DDMC Kuching naka 17 April tu tadi.
Residen Bagi Menua Kuching Sherrina Hussaini madahka penyampau nya sama enggau 90.7 peratus agih ke udah diberi ngagai genap sida ke begunaka bantu ke dipegai bagi menua Kuching.
“Ba pengawa bantu pemakai sekumbang Atur Tagang Pejalai (PKP), Opis Residen Kuching nengah DDMC udah nerima bayar penyampau RM3,200,000 ngambika meri bantu pemakai ngagai raban kategori B40.
“Penyampau nya udah sereta deka diagih enggau bela ba bantu tibang pemakai ngagai 16 sitak di Bagi Menua Kuching,” ku iya ti mega chairman DDMC Kuching.
Ba penerang berita nya kemari, Sherrina madahka piak sida deka seruran neruska pengawa meri bantu ngagai rayat ke beguna ba bagi menua Kuching.
Iya mega meri besai terima kasih ngagai Perintah Sarawak ti udah meri agih ngagai DDMC lalu ngemujurka pengawa sida meri bantu pemakai ngagai rayat ke beguna di bagi menua tu.
“Kelimpah ari nya, kami deka meri besai terima kasih ngagai semua gerempung ukai dikuasa perintah (NGO), Ketuai Komuniti enggau Ketuai Raban Bansa sereta Palan Servis ke udah mantu pengawa nyuaka bantu tibang pemakai ngagai rayat ba mengeri tu,” ku iya.
Sherrina sekali agi ngelalau barang sapa ke apin nerima bantu sereta ke begunaka bantu ba bagi menua Kuching ngambika betelefon ngagai hotline 24 jam DDMC nengah lumbur telefon 082-252941 tauka 082-507700 (lebuh jam opis dibuka).
