Pekara tu patut bepun ari pengajar nyendiaka ubah pelajar ke engkeman ungkup bala nembiak (sub heading)

SRI AMAN: Pengajar nyadi ketuai ti bepenau patut nemu pasal peminta dunya dudi ari ngambika pekara dalam nyendiaka pelajar ke engkeman ngagai bala nembiak ulih diubah.

Kepala Menteri Datuk Patinggi Abang Johari Tun Openg madah, tu sebengkah pekara ti mar tang tikas kualiti pelajar patut dikemeran.

“Pengajar nyadi ketuai, ditangkan nempa ketuai ti bepenau lalu pengajar patut nemu genap pekara ke nyadi.

“Nyadi ketuai sekula enggau komuniti patut ngembuan visyen.

“Enti nemu peminta dudi hari, pengajar patut ngubah diri empu seriris enggau pemansang dunya lebuh nyendiaka pelajar ke engkeman ngagai bala anak,” ku iya madah nyemetak.

Iya mansutka jaku nya rambau bejadika Pengerami Hari Pengajar Renggat Nengeri Ke-48 ti diatur di Dewan Suarah Sri Aman, kemari.

Iya nerang, pengajar nyadi ketuai ngembuan tanggungpengawa nyadi pemadah penemu ngagai bala komuniti.

“Reti iya, pengajar (sekula) patut ngerapitka kaul enggau komuniti ngambika ulih mantu sida ari pun ngambi enda tinggal dalam arus pemansang.

“Ukai meseti tang enggau naka ulih kitai meri bantu ngagai komuniti kelimpah nengah institusi ba sekula nyadi pemadah pasal penemu.

“Tu penemu aku pasal tanggungpengawa pengajar ke patut ngembuan mayuh runding,” ku iya.

Abang Johari mega ngelalau ngambika sistem pelajar ulih digaga nitihka ubah dudi hari.

“Diatu jeman teknologi. Enggau naka ulih, pelajar patut seriris enggau jeman nembiak diatu ngambi bisi asil.

“Nya alai, aku enggau Opis Menteri Pelajar Malaysia (KPM) besedia mantu pasal pemansang pelajar bala nembiak menua tu.

“Kitai bela nemu, pelajar tu meh chara pemadu manah ngambika bala anak enggau komuniti ulih meri pemansang ngagai sida empu,” ku iya.

Bisi datai rambau pengawa nya, Menteri Pelajar, Sains enggau Pansik Teknologi Dato’ Sri Michael Manyin Jawong, Menteri Muda Pengelantang Komuniti Datuk Francis Harden Hollis, Menteri Muda Industri enggau Beranakka Puku Malcom Mussen Lamoh,Kaban Parlimen Batang Lupar Dato’ Sri Rohani Abdul Karim, Kaban Parlimen Sri Aman Datuk Masir Kujat, Sapit Kepala Direktor Pelajar Malaysia Dato’ Sulaiman Wak, Direktor Pelajar Sarawak Dr. Azhar Ahmad, Adun Lingga Simoi Peri, Adun Engkilili Dr. Johnical Rayong Ngipa enggau Pemesai Pelajar Pelilih Sri Aman Dr. Abang Adam Abang Deli.