Tempap Gendang Pampat ngerichah HiPER’19

KUCHING: Berauh munyi tempap gendang pampat, ditempap betimbal enggau pangkung tawak ngerichahka palan besai bebelika barang MYDIN Petra Jaya ditu, Hari Enam nyin tadi.

Betuaika Ajat Sumoh, tim gendang pampat Serakup Ngajat Asal Iban Sarawak (Ngasi) Sarawak bejuluk Tajai Bekumbai Ambai nyerumba lemai sabung petang, tu raban Keling Aji ngiga peruji ati sulu tunang Kumang Dayang Tatai Kelingkang matak perati mensia mayuh beserimbai enggau Pejalai Gempuru Serakup Bansa 2019 (HiPER’19).

Ajat ti mega presiden serakup nya madahka raban sida dipebasa mantaika main asal Iban ba pejalai program ungkup Zon Borneo (Bumi Kenyalang) berengkah ari pukul 7.30 pagi nyentuk 10 malam.

Pejalai HiPER’19 diatur begulai Opis Pengerejista Gerempung Malaysia (ROS) Sarawak enggau Opis Menteri Dalam Menua (KDN) mai komuniti begempuru seraya berami enggau macham main asal ti bisi dibantai.

“Kami bisi mai tim gendang pampat enggau ajat ti merindang ba Ruai Main Asal (Terowong Kebudayaan) enggau ba panggau besai.

“Kelimpah ari nya, kami mega nyendiaka bangsal endur bala kaban serakup mantai enggau bejualka asil pengelandik jari sereta meri sanding penemu enggau penerang pasal serakup tu,” ku Ajat ngelansa lebuh dirandau Suara Sarawak.

Ku iya, sekeda ari rintai program dipasuk serakup sida iya nya mantaika Gendang Pampat ba Ruai Main Asal enggau Panggau Besai ROS_Care.

“Tim gendang pampat diuluka Tuai Sibat, aku empu, Alexander, Jarry, Roden, Lavignes, Jeremy enggau Sada ti nempap ketebung lalu Alvin deka mangkung tawak seraya Wallace enggau Darrent nyendiaka diri.

“Ajat digelar Kumang Nganjung Keling Nurun Ngayau ti dikeluluka Hendrix (Keling), Eliana (Kumang) enggau Recheal (Lulung) seraya Issac, Jara enggau Bajik ngajat ngelalu penatai bala temuai dipebasa.

“Udah nya Ajat Peransang Nurun Ngayau dikeluluka Issac, Jara enggau Bajik, Ajat Kumang Nyua Kereban Ngayau Ngagai Keling dibai Eliana enggau Hendrix ditangkan Ngajat Nurun Ngayau dibai Hendrix,” ku iya nerang silik.

Nambahka nya ku Ajat, Pekit Kumang enggau Keling mega bisi diatur ungkup nembiak mit umur biak ari 12 taun ke alai serakup sida mujur nyapai penyulut.

Iya madahka manuk sabungm sida, Issac menggi gelar Champion Pekit Keling seraya Bajik bulih gelar Lulung (lumur dua) ba Pekit Kumang.

Ajat madahka diri temegah ati meda pemujur dijapai sida sebuat kelebih agi rebak baru ti nampung pesaka asal bansa nipakka juluk serakup ngetanka penulin ajat asal Iban.

Iya mega meri besai terima kasih ngagai piak pengatur program ti udah meri peluang enggau masa sida mantaika main asal nyempulang serakup enggau gerempung main asal bukai.

NGANGKAT MAIN ASAL… Tabuh nyempulang ajat lebuh ngelalu temuai.

 

LANDIK… Manuk sabung Serakup Ngasi Sarawak mantaika Ajat Kumang Nganjung Keling Nurun Ngayau.

 

SEATI… Bala kaban Serakup Ngasi Sarawak datai ari sida ke nembiak enggau besai tuai nerima kangau mantaika main asal ba HiPER’19 Zon Borneo.

Suara Sarawak