Terenak tumu ulah angkunka Stem

MIRI: Raban nembiak patut dibai ngelala tumu pasal Sains, Teknologi, Injinir enggau Matematik (Stem) nentuka sida angkunka subjek Sains enggau Matematik tu.

Menteri Pelajar, Sains enggau Pansik Teknologi Datuk Sri Michael Manyin Jawong madah, kebuah pia laban penyampau tubuh nembiak ngambi pelajar Sains agi kurang ari tagit ti udah ditetap.

Iya mansutka jaku lebuh bejaku ba Pengawa Bejadika Stem Playground Miri di Pustaka Sarawak Miri, ditu tadi.

“Nembiak ti ngambi pelajar Sains di Sarawak diatu bisi 24.5 peratus niki mimit aja ari taun nyin tadi, 23.2 peratus, tang agi jauh ari tagit menua, manggai 60 peratus.

“Nadai entu mayuh tubuh rejista ngambi pelajar Sains ba renggat sekula sekondari atas ngujungka penyampau tubuh ngambi kus teknikal enggau Stem ba pelajar tinggi mega kurang,” terang iya.

BEKUNSI PENERANG… Datuk Sri Michael Manyin Jawong mendingka penerang pasal Stem pengudah bejadika pengawa nya.

Nya kebuah ku iya, Perintah Sarawak patut ngemai nembiak ngelala Stem tu tumu agi, enti ulih kenyau ari mit lalu diberi peluang nyerungkai chara belajar pasal Stem.

Ku Manyin, Sarawak diatu benung nyikap diri napi Revolusyen Industri 4.0 (IR 4.0) nya kebuah nembiak patut ngembuan pengelandik enggau penemu baka Stem ungkup dudi hari.

Berebak enggau nya, iya mega merambu bala pengajar subjek Sains enggau Matematik ba genap bagi menua patut digempuru bekunsika penemu chara ngajar ti ngasi agi.

“Diatu, tebal agi bala pengajar nyengkaum di kandang menua pesisir ‘semadi’ aja ngajar subjek Sains enggau Matematik laban nadai seling penemu ngajar subjek nya.

“Tebal agi sida tu pengajar ti ngajar subjek bukai tang dipinta ngajar subjek Sains enggau Matematik ketegal suntuk pengajar kelebih agi dua subjek nya,” ku Manyin nambah.

Stem Playground diatur dua hari berunggu tu dipejalaika Perintah Sarawak enggau Tabung Ekonomi Gagasan Anak Bumiputera Sarawak (Tegas).

Pengawa tu mega disukung Opis Menteri Pelajar, Sains enggau Pansik Teknologi (MESTR) enggau Kaunsil Multimedia Sarawak (SMA) ngaul kerejasama Curtin University Malaysia Kampus Sarawak di Senadin sereta mayuh bengkah ejensi bukai.

Tuju program tu nerenak ulah ngakunka Stem ngagai nembiak mit enggau nembiak bukai baka aktiviti bengkel, penerang pasal industri, pekit sereta ke bukai.

Sama datai Adun Telang Usan ti nyadi Kaunsil Amanah Tegas Dennis Ngau, Adun Batu Danau ti nyadi Kaunsil Amanah Tegas Paulus Gumbang, Menijar Wilayah Pustaka Miri Hajah Salina Haji Zawawi enggau Ketuai Pemesai Operasyen Tegas Awangku Merali Pengiran Mohamed.