Terima kasih raban pemberita

KUCHING: Media massa mayuh meri pangka ngagai pengidup rayat ninting hari, ku Datuk Seri Wan Junaidi Tuanku Jaafar.

Menteri Pemansang Orang Dagang enggau Gerempung Kerejasama nya madah, pekara nya terang agi dipeda kelebih agi rambau pengerekai igi penyakit Covid-19 diatu lalu mayuh penerang ti patut dibantaika ngagai rayat.

“Aku empu beterima kasih ngagai media laban udah mantu opis menteri aku mantaika penerang ngagai bala orang dagang enggau rayat baik nya ari media arus perdana tauka digital.

“Bala pemberita ulih ba dedini endur lalu pengawa nyadi siku pemberita tu chukup nyelai sereta ulih mai sida ngagai mayuh endur kelimpah betemu enggau orang ari mayuh serap komuniti ti bebida,” ku iya madah ba siti penerang, kemari.

Nangkan nya ku iya, media nyadi siti kuasa ti chukup mayuh meri pangka ngagai menua ti demokrasi lalu dikelala enggau ‘fourth estate’ ketegal pengawa digaga sida.

“Taja pia, diatu media digital balat agi dikerindu laban penerang jampat agi datai diberi ngagai mensia mayuh.

“Berindik ari pekara nya, media digital nyadi pelasar ke dipilih rayat,” ku iya.

Kelimpah ari nya ku Wan Junaidi, pelasar nya majak dikena ba pengawa mantaika penerang ke amat lalu ngubah peragam mensia mayuh,” ku iya.

“Nya alai rayat meseti pintar bekenaka pelasar nya ngambika enda dikena ba pengawa mantaika berita ke bula tauka ngajum orang bukai.

“Ngagai bala pemberita sereta raban media, kredibiliti siti pekara ti nyadi kelai pemadu beguna ba industri media ke diatu enggau jemah,” ku iya.

Wan Junaidi mega ngarapka raban media enggau pemberita ngambika seruran bejalaika tanggungpengawa ti manah sereta megai prinsip enggau etika pemberita ti manah.

Berebak enggau nya, iya meri Selamat Ngintu Hari Meredeka Surat Kabar Dunya ngagai semua pemberita enggau raban media ba selampur Malaysia.

Suara Sarawak