SARATOK: Rayat rumah panjai diperansang nerima pemansang dipejalaika perintah pulaika pemaik sida empu.
Penemu tu dipansutka MP Saratok Ali Biju lebuh bejaku ba mua mayuh rambau atur pejalai nemuai ngagai Rumah Stanley Timban ba Tapang Ujan, Mudong Roban ujung minggu tu tadi.
“Kitai dekaka rayat menua pesisir bela ngasaika pemansang baka sida ke diau ba mengeri laban udah nyadi juluk enggau tuju pengawa kitai.
“Terima mih pemansang, rebak dudi deka ngenang jasa enggau pengawa kitai jemah laban,” ku Ali.
Nangkan nya ku Ali, iya temegah meda sukung rayat ba semua atur pengawa ti udah, benung enggau dilanggur dipejalai ungkup sitak nya sereta meri tabi puji ngagai sida ti nadai kala limpang sereta besaup gawaka pemansang Saratok.
“Aku muji amat kaul kerejasama ti udah ditanggam kita ngelama tu lalu patut ditunda rayat bukai,” ku Ali nampung.
Beserimbai enggau pejalai nya, Ali mega bisi ngagihka bantu ngagai PIBG SK Mudong enggau JKKK rumah panjai kandang menua Tapang Ujan sepenyampau RM115,000.
