KUCHING: The Brooke Heritage Trust nyain Surat Sempekat (LoA) enggau Universiti Teknologi Swinburne Pampang Sarawak dikena nyukung pengawa pansik enggau latih amali.

Nengah LoA nya, kededua raban nya deka nyukung Degree Tinggi Pengawa Pansik (HDR) nembiak kelimpah pekara pansik bukai ti ngemerat pengawa nyaga pesaka ari teknologi sereta sejarah Sarawak.

The Brooke Heritage Trust mega meri bantu belanja sekularship pansik sepenyampau RM162,000 ba pengawa nembiak nampung pelajar ngagai renggat Master enggau PhD.

Sekeda pejuluk pansik nya ila mungkur sejarah, main asal, ekonomi, pesaka, pansik rampa menua, ekologi enggau antropologi.

Pia mega, projek nya mungkur sekeda sukut dunya bukai ti dikeandal ulih meri pemaik ngagai Sarawak.

Pengawa nyain LoA nya kemari, diarika Mandal Chanselor ti mega Tuai Pemesai Eksekutif Universiti Teknologi Swinburne Pampang Sarawak, Ir Profesor Lau Hieng Ho enggau Chairman The Brooke Trust and Museum, Jason Desmond Anthony Brooke.

Hieng lebuh bejaku madah, projek nya deka dirikod nyadi pesaka Sarawak nengah pengawa ngemansangka Arkib Borneo ngena teknologi skan.

Ku iya, mayuh peluang latih ungkup nembiak HDR deka disedia kelimpah peluang ungkup nembiak nyulut nyadi pelatih volunteer ba Muzium Brooke.