‘Thermal scanner’ diengkah ba semua padang bilun

KUCHING: Perintah Sarawak meli kediri ‘thermal scanner’ ngambika ulih diengkah ba genap padang bilun sereta pintu penama ba nengeri tu.

Kepala Menteri Datuk Patinggi Abang Johari Tun Openg madahka semua thermal scanner nya deka dibeli ngambika ulih nagang pengerekai igi penyakit koronavirus ba nengeri tu.

“Perintah Besai semina nyendiaka kereban nya ba padang bilun entarabansa aja.

“Tang ketegal irauka pengerekai igi penyakit tu ba nengeri tu, nya alai Perintah Sarawak mutuska genap pintu penama ba nengeri tu disediaka enggau kereban thermal scanner,” ku iya.

Abang Johari madah munyi nya ba aum pemberita pengudah ngetuaika aum Komiti Besai Gerempung Parti Sarawak (GPS) di Indu Opis Parti Pesaka Bumiputera Bersatu (PBB) ditu, kemari.

Nangkan nya ku iya, Perintah Sarawak seruran bejaga dalam pengerekai igi penyakit tu lalu mutuska tiap temuai ari menua luar diperesa ba genap pintu penama Sarawak.

“Sida ke datai ari menua China sigi enda dikemendar tama ke Sarawak.

“Ukai nya aja, sida ari Semenanjung Malaysia enggau Sabah ke bisi rikod pulai ari China 14 hari ke udah, ditagang bejalai ke Sarawak sebedau timpuh 14 hari nya tembu,” ku iya seraya ngasuh sida ngurung diri (self-quarantine) sebedau bejalai ke Sarawak.

Rayat China ke gawa ba nengeri tu sereta bisi rikod nemuai ngagai menua nya meseti ngurung diri ba rumah diri empu pengelama dua minggu mega.

Abang Johari mega madahka naka ke diatu kes ke dipelaba koronavirus agi negatif.

Suara Sarawak