KUCHING: Sepenyampau 25 tiang pemanchar telekomunikasyen baru udah tembu didiri ba sitak Parlimen Saratok.
Sapit Menteri Pengeluar Kuasa enggau Pengeraja Asal ti mega Kaban Parlimen Saratok, Ali Biju madah, kereja ngemanah 32 tiang pemanchar ke bisi diatu mega udah tembu dipejalai.
Ku iya, sekeda endur berengkah ngasaika peneras arus penyambung 3G enggau 4G nengah Projek Meri Servis Sebela (USP) dipejalaika Komiti Komunikasyen enggau Multimedia Malaysia (SKMM).
“Tuju kitai deka ngemayuhka agi bungkur arus penyambung bekenaka teknologi 4G ti meri pengelantang ngagai peranak ke diau ba menua nerima projek tu.
“Nya alai aku ngarapka projek tu dipejalai ba menua bukai ke alai 11 agi tiang pemanchar telekomunikasyen baru diperambu digaga dalam Pelin Sambung Digital Menua (Jendela) ngaul sekula, genturung pendiau enggau rumah panjai,” ku iya.
Ali mansutka jaku nya ngagai Suara Sarawak rambau pejalai nemuai gawa ngagai Opis SKMM Wilayah Sarawak ditu, apin lama ke udah.
Berebak enggau nya, 20 tiang pemanchar komunikasyen deka didirika Perintah Sarawak ngujungka sitak Parlimen Saratok deka bisi 31 iti tiang pemanchar.
Reti iya, kandang menua Saratok deka disikap 56 buah tiang pemanchar komunikasyen pengudah projek tembu ila.
Berita penuh ba Ruai 6 pagila
