ENGKILILI: Gempung Parti Sarawak (GPS) N.33 Engkilili udah sedia napi pengawa bepilih besai nengeri Ke-12 (PRN12) ti deka diatur sebarang maya.
Sekretari iya, Kaunselor Semijie Janting madah sida andal ulih ngerampas baru penuduk Engkilili ari penyandang ke diatu iya nya pengari rayat ari Parti Sarawak Bersatu (PSB) Dr Johnical Rayong Ngipa.
Nangkan ke nya, ku iya Parti Sa’ati Rayat Sarawak (SUPP) Engkilili nerima manah sukung ke udah dibantaika kaban Parti Pesaka Bumiputera Bersatu (PBB) Engkilili nengah Bengkel Pengerembai Penemu ke udah diatur ujung minggu tu tadi ba Sri Aman.
“Sida bela sepenemu nyukung barang sapa aja ti deka dipilih ketuai GPS bediri ba PRN12 tu ila.
“Parti SUPP Engkilili mega nengah Komiti Pampang sereta komiti GPS Engkilili udah nganjung nama chalun ungkup ngerampas baru penuduk Dun Engkilili ari penyakal.
“Entara tiga chalun tu iya nya aku empu, Kua Jack Seng enggau Desmond Sateng Sanjan,” ku iya madah sebengkah penerang berita, kemari.
Ba penerang nya mega bisi ngelansa tikas pelajar ke dikembuan tiga chalun ari GPS Engkilili nya.
Chalun keterubah Semijie, 50, asal ari San Semanju ngembuan Degree Sains Pemansang Mensia, Universiti Putra Malaysia (UPM), gawa nyadi Kaunselor ba Opis Kaunsil Pelilih Lubok Antu.
Nangkan ke nya, Kua, 45 asal ari Pasar Engkilili ke mega siku orang dagang ngembuan tikas pelajar Degree Kejuruteraan Awam ari University Herfordshire, United Kingdom (UK).
Udah nya, Desmond, 59, asal ari Skim Skrang ngembuan tikas pelajar MBA ari Heriott Warr University, Scotland, UK. Kala gawa nyadi pengelicha kanan di sebuah IPTS ba menua tu.
Semua sida tiga tu endang udah ngembuan mayuh peneleba ba politik menua.
