Tiga iku tesat ngiga lukan udah ditemu

LUNDU: Dua indu enggau siku lelaki dipelaba lenyau lebuh ngiga lukan ba sungai Kampung Perigi mujur ditemu, malam tadi.

Dulu ari nya, siti ripot udah digaga ba Opis Polis Lundu pengudah nadai pulai ke rumah lebuh nurun ngiga lukan kena lemai Hari Satu tu tadi.

Berindik ari ripot nya, piak polis telefon ngagai raban Bomba enggau Penyah Penusah mantu operasyen nyidi sida tu.

Nitihka penerang ari Pengari Palan Operasyen Bomba enggau Penyah Penusah Sarawak, sida nerima ripot nya urung pukul 7.50 lemai sebedau nganjung seraban ari Opis Bomba enggau Penyah Penusah (BBP) Lundu ngesah ngagai endur penusah nyadi.

“Raban bomba ngepunka pengawa nyidi sida tu nengah bantu peranak diau ngelingi endur nya.

“Sida udah ditemu selamat urung 5 Kilometer (km) ari ili sungai,” ku iya meri penerang.

Terang iya, sida tu udah tesat sereta puntan ngiga jalai pulai nitihka penerang diterima.

Suara Sarawak