Tiga kes pemati, 142 iku suman

KUCHING: Sarawak ngerikod tiga kes pemati di Sibu ngujungka kes pemati nambah ngagai 33 kes.
Sarawak ngerikod 205 kes baru positif Covid-19 iya nya 51 kes di Sibu, 41 kes di Kanowit, 32 kes di Miri, 22 kes di Dalat, 19 kes di Bintulu enggau 10 kes di Kuching sereta bela lima kes di Kapit enggau Lawas.
Nambahka nya, bela empat kes di Sarikei enggau Julau, tiga kes di Simunjan, bela dua kes di Pakan, Betong enggau Meradong sereta bela siti kes di Samarahan, Saratok enggau Marudi ngujungka kes nambah ngagai 3,704.
Chairman Komiti Penyangga Penusah Nengeri Sarawak (JPBNS), Datuk Amar Douglas Uggah Embas madahka kes pemati ke-31 nya kes ke-3,460 ngaul siku lelaki peranak menua beumur 59 taun kena 22 Januari tu tadi.
“Niang bisi kelai renga enggau batuk lalu ditukuka bebadi nyawa pukul 4.45 pagi kelimpah iya mega bisi sakit tinggi darah enggau atrial fibrilasi.
“Kes pemati ke-32 nya kes ke-3,461 ngaul siku lelaki peranak menua beumur 76 taun laban pedis enseput enggau bisi kelai renga enggau batuk bisi dak sebedau tu lalu ditukuka bebadi nyawa pukul 4.45 pagi, 25 Januari tu tadi.
“Kes pemati ke-33 nya kes ke-3,659 ngaul siku lelaki peranak menua beumur 91 taun ti diperubat ba Sepital Sibu kena 24 Januari tu tadi laban ditemu sida sebilik enda ngeleda.
“Orang tuai nya bebadi nyawa kena 25 Januari tu tadi lalu ditemu positif Covid-19 kelimpah iya bisi penyakit bukai baka penyakit tungkul sengayuh, tinggi darah enggau penyakit lempuang,” terang Uggah.
Naka tu, bisi 1,706 agi diperubat ba wad isolasyen ke alai 1,088 kes di Sepital Sibu, 304 kes di Sepital Miri, 162 kes di SGH, 97 kes di Sepital Bintulu, 40 kes di Sepital Kapit, 14 kes di Sepital Sarikei enggau siti kes di Sepital Limbang.