Tiga kes positif ari ACD

KUCHING: Tiga kes positif ditemu ari Operasyen Nyidi Kes Aktif (ACD) dipejalaika ba Taman Desa Ilmu enggau Taman Uni Garden apin lama ke udah.

Sapit Kepala Menteri Datuk Amar Douglas Uggah Embas madahka tiga kes tu diatu benung diperubat di Sepital Besai Sarawak (SGH).

“Rambau operasyen nya, bisi 15,583 iku ari dua genturung pendiau tu udah diperesa lalu 885 iku udah datai ngambi chunto lendir sida.

“Naka ke diatu, semina siku aja ke udah datai apin nganjung diri beperesa lalu Opis Pengerai Samarahan benung ngiga iya ke apin meresa diri tu,” ku iya.

Kelimpah ari nya, bisi 34 iku udah mujur nembuka timpuh kuarantin sereta dikemendar pulai ke rumah diri empu.

Suara Sarawak