KUCHING: Pejalai projek fizikal Pemansang Rantau Sungai Begulai (PLSB) Sungai Sarawak ti mungkur tiga pakej disadang tembu manggai tengan 2026.
Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr Penguang Manggil madah, projek Pakej 1 enggau 3 disadang tembu Mei 2026 seraya Pakej 2 disadang tembu June 2026.
“Nya kebuah, status projek fizikal PLSB Sungai Sarawak Pakej 1, 2 enggau 3 bela 9.57 peratus, 0.27 peratus enggau 0.40 peratus,” ku iya.
Dr Penguang mansutka jaku nya lebuh nyaut tanya Kaban Kunsil Nengeri (ADUN) Batu Lintang, See Chee How bekaul pejalai projek nya ba hari kedua Aum Kunsil Nengeri (DUN) Sarawak, ditu kemari.
Ku iya, pejalai projek nya mungkur Pakej 2 enggau 3 iya nya 0.27 peratus dibanding taga asal 1.77 peratus (laun 1.5 peratus) enggau 0.40 peratus, dibanding taga asal bela 3.23 peratus (laun 2.83 peratus).
Iya madah baru, Pakej 2 projek nya mungkur pengawa ngerawang enggau ngaga pegung ai ti disebut pegung ‘Pengurusan Air Ribut Bandar Sarawak (SUStoM)’ di kuarters lama indu misi.
“Opis Parit enggau Entali Ai (JPS) udah ngeluar ke atur badu kereja kena 7 Ogos 2024, berindik ari Gerempung Pesaka Asal Sarawak (SHS) ngapil ngambi nyaga kuarters lama indu misi ti disebut nyadi begunan pesaka,” terang iya. -JASMINE AIDIL FITRI
