KUCHING: Komiti Penyangga Penusah Ngenyit Nengeri (JPBN) Sarawak kemari madahka Pelilih Kuching udah pulai baru ngagai status gadung pengudah 14 hari nadai ngerikod kes dalam menua.
Chairman iya, Datuk Amar Douglas Uggah Embas madah sehari tu Sarawak ngerikod tiga kes baru positif Covid-19 ba Pelilih Kuching, Sri Aman enggau Bintulu ngujungka kes nambah 724 kes.
Ku iya, kes ke-722 tu siku lelaki peranak menua gawa enggau ngentapka diri ba Sri Aman ditemu positif Covid-19 kena 6 Oktober tu tadi pengudah pulai kemisi ari Kuala Lumpur enggau Putrajaya.
Uggah madahka kes ke-723 tu siku lelaki peranak menua baru pulai ari Kuala Lumpur lalu sangkai ba Padang Bilun Entarabansa Kuching (KIA) kena 3 Oktober tu tadi.
Nambahka nya, kes ke-724 tu siku lelaki peranak menua ti gawa nyadi jaga ba Tawau, Sabah enggau ditemu positif Covid-19 lebuh beperesa ba hari ke-10 (6 Oktober) di Klinik Pengerai Bintulu enggau udah dipasuk ba Sepital Bintulu ungkup pansik bukai.
Beduduk ari nya, Uggah madahka semua kes nya nadai mantaika kelai enggau dikategori kes import B kelimpah pengawa nyidi kaul benung chakah dipejalai.
Kemari, bisi siti kes udah suman enggau dikemendar pansut ari Sepital Bintulu ngujungka kes suman nambah 684 iku tauka 94.48 peratus.
Kes ti diperubat ba wad isolasyen nambah tiga kes ngujungka bisi 21 iku agi diperubat iya nya 11 kes ba Sepital Besai Sarawak (SGH), Sepital Miri (6), Sepital Sibu (3) enggau Sepital Bintulu (1).
Kes pemati mengkang 19 iku tauka 2.62 peratus seraya bisi empat PUI baru diripot enggau siti kes PUI agi nganti pemutus makmal.
