KUCHING: Indu Opis Polis Kontinjen (IPK) Sarawak naka diatu udah nerima tiga ripot bekaul siti video ti mantaika siku ex- Kaban UMNO, Zool Amali Hussin tauka ‘Bozz Jebat’ ngemelika Premier Sarawak, Datuk Patinggi Tan Sri Abang Johari Tun Openg.
Kepala Polis Sarawak, Datuk Mancha Ata madahka dua ripot diterima sida ba Balai Polis Santubong enggau siti agi ba Balai Polis Gita.
“Kes nyu deka dipansik ba baruh Seksyen 4(1) Akta Hasutan/Seksyen 233 Akta Komunikasi dan Multimedia (AKMM),” ku iya tadi.
Ba video nya ti dikemegau ba sebelah media sosial, ‘Bozz Jebat’ mejah pemutus Abang Johari nyiri Datuk Seri Tiong King Sing nyadi Menteri Dagang Temuai Malaysia.
Maya ti mejah Abang Johari nya, ‘Bozz Jebat’ ngena leka jaku ti enda manah.
Bepelasarka siti ripot ti digaga Gerempung Pesaka Anak Sarawak (WARIS) enggau Gerempung Pengintu Pengelantang Bakih Penempa Mensia Sarawak, sida ngaku ulah ‘Bozz Jebat’ nya chukup enda beradat.
“Maya ti mejah nya, ‘Bozz Jebat’ ukai semina ngena leka jaku enda manah tang bechiping kelimpah ngemaruh, ngemeli enggau ngemaluka penuduk sereta kredibiliti siku tuai pemadu besai ba Sarawak,” ku iya.
