KUCHING: Gerempung Pemansang Kota Padawan enggau Kaban Kunsil Nengeri (Adun) Batu Kitang Lo Khere Chiang bekerejasama nyuaka bantu beg sekula ngagai tiga buah sekula ba sitak nya.
Bisi 300 iti beg sekula udah disua ngagai Sekula Bansa China (SJK) Chung Hua Batu 10 (150), Sekula Primari (SK) Landeh (75) enggau SK St David (75).
Khere Chiang ti mega Chairman Majlis Perbandaran Padawan (MPP) madah, beg sekula nya ungkup bala nembiak ari ruang bilik kurang penatai pemisi.
“Kami enggau naka ulih nagang pekara bekaul enggau kes positif Covid-19 ba menua tu.
“Kami meri terima kasih ngagai Gerempung Ukai Dikuasa Perintah (NGO) ti udah mantu nyuaka barang diguna ngagai peranak ba sitak tu,” ku iya.
Khere Chiang mansutka jaku nya lebuh dirandau pemberita ba SJK Chung Hua Batu 10, ditu tadi.
Iya ti bisi datai nyuaka beg sekula kemari madah, iya udah meli kereban meresa pengangat isi otomatik berega urung RM3,600 ungkup lima buah sekula.
“Entara sekula ti deka nerima kereban tu iya nya SJK Chung Hua Batu 10, SK Batu Kitang, SK Jalan Arang, SJK Chung Hua Batu 4 1/2 enggau SJK Sam Hap Hin,” terang iya.
Ba lansa sama, iya mega meri terima kasih ngagai Opis Bomba enggau Penyah Penusah Nengeri ti udah bejalaika operasyen sanitasyen ba sekula, rumah sembiang enggau palan mensia mayuh ba sitak nya.
“Aku mega berasai gaga laban udah mantu mensia mayuh lalu pekara nya nunjukka kitai ngembuan semengat volunteer sereta ngaul komuniti ngambi ngemujur pengawa tu,” tandu iya.
