Tiga taska deka dipilih nerima Anugerah Taska Bekualiti

KUCHING: Penerima Anugerah Taska Bekualiti di Sarawak deka nerima bantu RM18,000 ari Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit.

Perais tu deka disua beserimbai enggau enggau program Randau Pemansang Tumu Nembiak Mit ti deka diatur enda lama agi, ku Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah

Ku iya bisi tiga buah taska deka dipilih nerima anugerah tu.

“Opis menteri kami bisi bejalaika pengawa ngelawa taska ti bisi di Sarawak, ari nya sida lalu meri poin sereta milih taska ti pemadu bekualiti ba pemansang pelajar anak mit.

“Perais ti deka diberi iya nya duit geran khas ngagai lumur satu RM7,000, lumur dua RM6,000 enggau lumur tiga RM5,000,” ku iya.

Fatimah bejaku munyi nya ba aum pemberita pengudah ngatur aum Randau Pemansang Tumu Nembiak Mit di Begunan Baitul Makmur ditu, kemari.

Ku iya, entara tuju sida ngatur Anugerah Taska Bekualiti tu laban deka nyadi malin ngagai taska bukai ngambika terus ngatur pemansang ba taska sida.

“Pia mega, duit geran khas tu ulih dikena nambahka perengkaguna taska sida awakka majak bekualiti.

“Anugerah tu ila deka disuaka Tuai Pemegai Menua Tun Pehin Sri Haji Abdul Taib Mahmud lebuh pengerami bejadika randau,” ku iya.

Tambah Fatimah, mayuh ejensi bekaul udah mantu enggau ngatur Randau Pemansang Tumu Nembiak Mit ke sekali tu baka Opis Pemansang Mensia Mayuh Nengeri Sarawak (Kemas), Opis Pelajar Nengeri Sarawak (JPNS), Opis Pengintu Pengelantang Mensia Mayuh (JKMS), Yayasan Sarawak, SeDidik enggau ejensi ke bukai.

Randau deka diatur kena 13 ngagai 15 September sepengelama tiga hari ba Hotel Pullman Kuching.

Barang sapa deka ngulu randau tu, peluang ngerejister agi tebuka nyentuk Hari Dua tauka 10 September tu ila.

Sama bisi ba aum pemberita kemari Sekretari Mendam Opis Menteri Dr. Saadiah Abdul Samat enggau Ketuai Bagi Menua Pemansang Tumu Nembiak Mit Salina Bujang.