KUCHING: Serikat penerebai bilun ba menua tu patut nyendiaka tambang murah dikena pulai ke menua rambau musim pengerami Hari Gawai Dayak enggau Hari Raya ti deka datai.
Ketuai Whip GPS ti mega nyadi Kaban Parlimen Petr Jaya Datuk Seri Fadillah Yusof madahka tu atur patut dipejalai dikena ngelempungka berat ditapi sida ti deka ngintu dua bengkah pengerami tu.
“Kitai minta ngambika pekara tu seruran diperatika sereta nyendiaka tambang murah ngagai tiga bengkah serikat penerebai iya nya MAS, AirAsia enggau Malindo.
“Serikat penerebai patut meri tambang murah ngagai sida ke deka pulai ngintu dua pengerami tu sama baka digaga lebih pengerami Taun Baru Cina Februari tu tadi,” ku iya ba siti pengarang berita.
Ku Fadillah, lebuh pengerami Taun Baru China ti diintu Februari tu tadi, Anthony Loke Siew Fook madahka tiga serikat penerebai menua (MAS,AirAsia enggau Malindo) nambahka penyampau 376 penerebai jauh malam hari.
“Penerebai jauh malam hari tu diberi enggau rega tambang ti murah berengkah ari timpuh 30 Januari ngagai 12 Februari tu tadi.
“Kitai ngarapka perengka guna ti sama mega diberi ngagai sida ti deka pulai ke menua ngintu pengerami Hari Gawai enggau Hari Raya ti deka diintu enda lama agi,” ku Fadillah.
Seraya, iya meri terima kasih ngagai Komiti Penerebai Malaysia (MAVCOM) ti udah ngemendarka 851 penerebai nambah ngagai jalai domestik beserimbai enggau pengerami Kaamatan, Hari Gawai enggau Aidilfitri 2019 berengkah ari 25 Mei ngagai 17 Jun.
