SIBU: Sarawak champion Pekit Bola Tampar Indu serimbai Lumba Malaysia (Sukma) XXI Sarawak 2024 pengudah ngalahka Selangor ba renggat kepenudi pekit nya.
Penyulut nya ngetuka kemarau midul emas pengudah Sarawak keterubah iya bulih emas ba pekit sebaka ba taun 2013 suba.
Pekit kepenudi ti diatur ba Stadium Bola Tampar Taman Rejang ditu, tadi ti dikemataka lebih 1,000 penyukung nya dikuasa tim Sarawak ti nyadi tim dipilih ungkup edisi sekali tu.
Sarawak ti ngembuan pemain bepenau besai nyulut agi nguasa gelanggang taja pen Selangor nguji angkat baru ari alah ngerebut penuduk nya.
Ba renggat keterubah, Sarawak menang 25-15 mata sebedau dientudika 25-16 mata ba renggat kedua lalu ba renggat ketiga, tim Selangor nguji angkat baru sereta ngemataka kededua tim nya berebut ngulihka mata.
Semekih besai ba renggat ketiga diketuka nengah penyulut Selangor ti mujur ngumpul 25-21 mata.
Taja pia, tim tuai rumah enda nganti lama ngelabuhka Selangor pengudah mujur ngumpul 25-18 mata sebedau mai pulai emas.
Jurulatih tuai rumah, Sanong Kulchim madah, pengiruh sida belatih pengelama tiga bulan mujur mansutka asil pengudah tim bola tampar Sarawak mantaika penyulut sepanjai pekit nya diatur.
“Juluk kitai endang deka mai pulai emas lalu tu siti penyulut pemadu manis, kami mujur meri emas ungkup Sarawak,” ku iya.
Nangkan nya, Penulung Jurulatih, Angela Tang madah, tim sida semina ngeleda rentak main enggau nguasa pekit ba set kedua.
Iya madah, penyulut ba pekit nya beguna amat ngagai tim ungkup nerus penyulut Sarawak pengudah tu.
