KUCHING: Tim Immune Belt Enforcement Team (IBET) deka ditumbuh ba mengeri enggau mengeri pesisir ungkup meri servis vaksin rabies ba genturung nya.
Menteri Industri Pemakai, Komoditi Enggau Pemansang Wilayah Sarawak Datuk Seri Dr. Stephen Rundi Utom madahka pekara nya bekau ari penyampau beri vaksin ngagai ukui agi kurang kelebih agi ba mengeri enggau mengeri pesisir.
“Raban bekuasa udah ngambi jalai proaktif enggau mansik semua protokol ti bisi dalam mantu Opis Servis Veterinar Sarawak (DVSS) ditu.
“Chara nya lebih silik laban ulih ngasuh raban IBET datai ngagai palan mengeri enggau mengeri pesisir sereta mantu nambahka penyampau beri vaksin,” ku iya.
Rundi bejaku munyi nya rambau aum pemberita pengudah bejadi Gempuru Rabies di Borneo (RIB) ba sebuah hotel ditu tadi.
Ku iya, kerejasama ari kaunsil menua mega diguna dalam nyapai juluk ati munaska pengerekai penyakit tu.
