KUCHING: Tim main bol Kuching FA nyengkaum pemesai enggau pematih diasuh enda tau enda kuarantin pengelama 14 hari ba rumah diri pengudah siku ari pemain sida dituku positif Covid-19 ensana (Hari Lima).
Kenu ku Pemantu Pematih Mohd Sharizan Sahari, semua sida dipinta beperesa swab Covid-19 ba Klinik Pengerai Petra Jaya kemari.
Ungkup peresa swab sida sebilik agi bedau tang bisi pemain bukai ke positif penyakit nya.
“Diatu, kitai semina bejalaika peresa swab Covid-19 ungkup sida ke bisi kaul semak enggau pemain pemain nya,” ku iya madah ngagai Suara Sarawak kemari.
Tandu iya, kitai ngarapka semua pemain, pematih enggau pemesai enda kena rampit penyakit nya.
Ku iya mega, pemutus peresa swab Covid-19 deka ditemu dalam timpuh tiga ngagai empat hari deka datai lalu tim nya mega deka bejalaika peresa kali kedua kena 5 Ogos tu.
Dalam penerang rasmi ba media rama Kuching FA ensana, tim nya ngenukuka siku pemain sida ke mega staf Sepital Kota Sentosa positif Covid-19 lalu dikategori kluster Sentosa.
Tim nya mega udah ngaga atur lengkas ngetuka dulu semua latih lalu nitih atur ke udah ditetap piak bekuasa ungkup pengelikun bala pemain enggau mensia mayuh.
Kelimpah nya, tim mega madha sida ngemeratka pengawa nitihka Atur Pengawa Standard (SOP) ke udah diletak piak perintah enggau Liga Main Bol Malaysia (MFL) bekaul enggau latih ninting hari tim.
Tim tu mega bejalaika latih ba padang main bol kenyau sebulan ke udah dikena nyikap diri napi Liga Premier 2020 ke deka disambung baru berengkah 26 Ogos tu.
