KUCHING: Dua nembiak Pom Tiga mantu Sarawak nambah dua midul pirak enggau siti midul engkeraju nengah pekit silambam ti diatur ba Palan Hikmah Exchange ditu, tadi.

Sarawak nurai sejarah kediri empu pengudah Asyraff Aqil Mohamad Zainurrin, 15, mujur nempa nama bepekit ba panggau kepenudi besatup enggau pengari Selangor, Lutrabalan.

Taja pia, iya semina bulih penuduk kedua pengudah ngumpul 16 mata enti dibanding Selangor bulih 27 mata.

Juluk Sarawak deka ngenggam midul emas ba pekit silambam sekali agi puntan pengudah Hani Qurratu’ain Samsudin alah ngagai pengari ari Pulau Pinang, Ranishaa Vasantha Kumar.

Pekit kepenudi kategori indu berat lebih 70 kilogram (kg) ngemataka kededua atlit nya bela besemekih besai tang peneleba dikembuan pengari Pulau Pinang nya majak dikelala pengudah iya nguasa pekit nya ba renggat keterubah.

Ranishaa champion ba kededua renggat pekit nya kelimpah bulih 23 mata enti dibanding Hani ti semina bulih 11 mata ari bala akim.

Nangkan nya, siku agi pengari Sarawak, Nur Aleesya Zahierah Sali, 15, mujur bulih midul engkeraju nengah kategori indu 60-70 kg.

Iya menggi penuduk ketiga begulai enggau pengari ari Sabah, Phideona Tilip pengudah seduai alah ba renggat setengan kepenudi.

Pengari ari Kedah, Vinishya Pugeneswaran nguasa pekit nya pengudah iya ngempu gelar champion lalu penuduk kedua dipenggi pengari ari Pulau Pinang, Shangeetha Baskaran.