Timang mai semengat nikal pulai

LEMAMBANG Iban dikumbai kitai siku orang ti chukup landik nimang leka main ngujungka sida tu tebilang nama enggau jelai rita kelebih agi jeman aki ini kitai agi rat bepegai ba pengarap lama.

Bala lemambang mega chukup dibasa enggau dikemegah kelebih agi sida ke angkunka pengawa nimang baka nyadaka leka timang jalung enggau tiun ke chukup manah didinga kelimpah pengepuh sida nimang apus malam.

Nitihka jerita, lemambang nadai ngetu nyadaka leka timang berengkah ari lemai hari urung pukul 7.30 nyentuk pukul empat dini hari.

Pengepuh sereta pemanah patah nyawa sida nimang ngasuh orang bukai rindu amat ninga kelimpah leka timang ti semitan sereta bisi reti.

Sida mega suah nimang leka main bukai lebuh bisi pengawa nirika gawai besai kitai Iban baka Gawai Antu laban ru sebansa gawai ti mantaika penyelai adat enggau basa.

Gawai Antu tu awak kitai ngintu adat pemati dikumbai merantu orang ke udah midang enggau tu siti adat asal Iban sereta basa besai diberi ngagai bala diri sebilik ke udah parai nyerumba lemai, udah mati nyerumba hari, udah midang nyerumba petang, udah danjan nyerumba malam enggau udah nadai lalu ninggalka kitai.

Kelimpah meri basa ngagai bala diri sebilik ti udah ninggalka dunya injau tu, Gawai Antu mega siti adat bansa Iban. Gawai tu tau dikumbai nyelai laban tu maya kitai ngangauka semengat orang ti udah midang nyau pulai ngagai menua asal, datai ari Dunya Sebayan.

Nya kebuah, bansa kitai ngena Lemambang Timang Jalung laban iya nguluka pejalai semengat orang ti udah parai nikal pulai baru ngagai menua kitai ti agi idup tu.

Tu mih basa kitai ngagai kaban belayan enggau diri sebilik ke udah nadai nya lalu suah agi rumah panjai ti rabat nya deka ngangauka rumah panjai bukai ngambi ngulu pengerami Gawai Antu tu.

Bisi sekali aku ngulu Gawai Antu tu ba rumah panjai kami di Kedap, Saratok dalam taun 1973 pengudah beberapa hari ninga pemati niang Bruce Lee, orang ti dikemegah aku.

Aku mulaika pengingat lebuh mendingka berita ba radio madahka niang Bruce Lee udah nadai ba Hong Kong, nyau temati kutu lalu utai dikereja tebelengka magang lebuh nyendiaka diri ngintu Gawai Antu.

Sama bisi enggau aku ngintu Gawai Antu iya nya niang Tun Jugah Barieng (Ketuai Orang Iban lalu nyadi pemesai Iban keterubah dichiri nyadi Menteri dalam Perintah Besai) ti meri sukung ngagai Musa Giri (diatu udah bulih gelar Datuk), Tan Sri Datuk Gerunsin Lembat, Datuk Amar Dunstan Endawi Enchana sereta Datuk Tawi Sli.

Aku agi ingat, mai Jugah mindah ngagai bilik aya Musa urung pukul empat dini hari maya Malam Gawai nyadi lalu iya nyain keretas Anugerah Sekularship Perintah Besai tiga taun ke udah (ba Kuching lalu Musa nyadi penjamin aku).

Kelimpah ari lemambang timang jalung, bisi mega lemambang ba pengerami bukai baka lemambang ba pengawa pengap lebuh bisi pengerami besai baka Gawai Kenyalang, Gawai Umai, Gawai Batu, Gawai Burung, Gawai Tajau sereta pengawa bukai baka belian sereta sabak.

Sabak tu mai reti pengawa ngiring pemati datai ba penyangkai ba rumah sebayan lalu sabak tu dikenatai orang ti tebangkar dalam leka sabak dikumbai kitai tukang sabak.

Leka sabak tauka nyabak ke orang ti udah parai tu endang pengawa dikena meri basa kepenudi tauka penyinu enggau penusah ati ngagai orang ke udah parai.

Penyelai leka jaku Iban ngujungka kitai dibasa dunya kelimpah ngembuan pengeraja ari sukut litaricha enggau main asal taja pen orang kelia tebal agi, kurang nerima pelajar enggau buta urup.

Niang apai aku, Salok (1910-2002) nya siku ketuai lemambang timang jalung enggau pengawa pengap ti dipebasa laban ngembuan pengelandik nimang taja pen buta urup.

Iya mega kala ngajar aku nimang pasal dunya burung, dunya orang ke udah mati, semengat enggau pengaruh sitan enggau timang ke bukai lebuh sida pulai ke Sebayan tauka Serega lalu nikal pulai ke rumah ba Pengerami Gawai Antu.

Timang jalung tu sebansa tiun ti nyauka sebaka enggau leka main. Apai kala madahka iya diajar siku lemambang benama Belayong ti ngajar iya leka main ngena papan turai lalu gambar tauka ukir jelu, sitan enggau roh bukai didero ba papan belian.

Nambahka nya, aku mega kala betemu enggau orang ke landik amat nulis bup leka main enggau jaku Iban. Siku ari sida ti tebilang pasal jaku enggau gaya idup iya nya Prof Derek Freeman ari Australian National University (ANU) ti kala nulis tiga bup nusui pasal jalai pengidup bansa Iban.

Freeman mega kala ngajar Masing (Tan Sri Datuk Amar Dr James Jemut Masing) dalam taun 1970-an ba ANU.

Aku betemu enggau Freeman ba Penang lebuh Hari Krismas keterubah aku ba mengeri nya dalam taun 1975 lalu kami duai bela berandau pasal mayuh pekara bekaul gaya idup bansa Iban sereta sama makai rian enggau ngirup bia.

Ba taun 1976, aku kala ngalihka empat bup Iban ngagai jaku English iya nya Bujang Penerang, Raja Langit, Stangkai enggau Dayang Ridu Bujang kerimpak Labu enggau Freeman kala ngasuh aku ngalih Jaku Iban ngagai Jaku English ba cherita Apai Saloi.

Kelimpah kala ngelala Freeman enggau Santher, penulis bukai mega ngembuan pengelandik nulis Jaku Iban baka Malcolm Macdonald, Vincent Suttclive Jr, Ling-Roth ke chukup landik nulis jaku Iban dalam taun 1900.

“Iban tu kaya enggau jaku sereta leka mai,” pia ku Fremman madah ngagai aku, Santher enggau lemambang bukai lebuh kami begelumu berandau enggau pangan diri.

Suara Sarawak